Poukisa l bon pou nou viv selon prensip ki nan Bib la?

ÈSKE pwennvi Bib la sou sèks se yon pwennvi ki pase mòd e ki vin ak yon seri restriksyon ki pa nesesè? Non. Okontrè, pwennvi Bib la sou sèks kapab ede nou evite:

▪ Maladi moun trape nan fè sèks.

▪ Ansent pou yon moun nou pa marye avè l.

▪ Lapenn ak lòt konsekans maryaj ki kraze pote.

▪ Gen yon konsyans ki twouble.

▪ Gen santiman kòmkwa nou pa vo anyen paske lòt moun te pwofite nou.

Kreyatè nou an, Jewova Dye *, vle nou jwi kado li fè nou yo. Bondye se Sila a “k’ap moutre nou sa ki pou byen nou”. (Izayi 48:17.) Yon moun ki viv selon prensip ki nan Bib la anrapò ak sèks gen:

▪ Apwobasyon Bondye.

▪ Lespri l anpè.

▪ Yon relasyon ki pi solid ak fanmi l.

▪ Yon bon repitasyon.

▪ Respè tèt li.

Men, e si w pap viv selon prensip moral ki nan Bib la pou kounye a? Èske l posib pou w chanje fason w ap viv? Èske Bondye ap padone sa w te konn fè anvan yo?

Ann egzamine yon pwen: Gen kèk nan moun ki te fè pati kongregasyon nan premye syèk la ki te konn fè fònikasyon, adiltè ak omoseksyalite anvan yo te vin kretyen. Yo te chwazi chanje fason y ap viv, e Bondye te padone yo (1 Korentyen 6:9-11). Jodi a, gen plizyè milye moun toupatou sou tè a ki fè menm chwa a.  Yo sispann mennen vi lib yo t ap mennen an e yo jwenn byenfè moun jwenn lè yo viv selon prensip ki nan Bib la. Pa egzanp, ann pran sa k te pase Sara nou te pale de li nan premye atik la.

“Mwen te santi m soulaje tousuit”

Sara te vin rann li kont vi lib li t ap mennen an pa t fè l jwenn libète ak satisfaksyon li t ap chèche yo. Men sa l di: “Mwen te santi konsyans mwen pa t sansib ankò, mwen te wont e mwen te pè pou m pa t ansent oswa pou m pa t trape yon vye maladi. Mwen pa t janm sispann kwè nan Bondye, e mwen te konnen fason m t ap viv la te fè l lapenn. Mwen te santi m pa pwòp, e santiman sa a te fini avè m.”

Alafen, Sara te jwenn fòs pou l chanje fason l t ap viv. Li te chèche èd paran l ki Temwen Jewova. Li te chèche èd nan men ansyen nan kongregasyon an tou. Li di: “Mwen te kontan e m te sezi pou fason paran m ak ansyen yo nan kongregasyon an te akeyi m avèk jantiyès e avèk amou. Mwen te santi m soulaje tousuit.”

Kounye a, Sara gen de pitit l ap leve. Men sa l di: “Mwen pa kache pitit mwen yo anyen konsènan chwa mwen te fè nan lavi m. Mwen vle yo konprann lefètke mwen te meprize prensip Bondye yo ki konsekans sa te gen nan lavi m. Objektif mwen se pou m ede yo apresye byenfè yon moun jwenn nan domèn fizik, mantal e afektif lè l viv selon prensip Bondye yo anrapò ak sèks. Mwen gen konviksyon rezon ki fè Bondye ban nou prensip moral se paske li pa ta renmen wè n ap soufri.”

Ou menm tou ou ka jwenn byenfè si w suiv konsèy Bondye ban nou avèk amou. Men pwomès Bib la fè: “Regleman Senyè a se bagay ki dwat. Moun ki swiv yo ap gen kè kontan. Kòmandman li yo klè. Yo louvri je moun. [...] Gen gwo rekonpans pou moun k’ap obeyi yo.” — Sòm 19:8, 11 *.

[Nòt anba paj]

[Antrefilè nan paj 8]

Souvan, moun ki meprize prensip ki nan Bib la lakòz lòt moun soufri nan domèn afektif.

[Antrefilè nan paj 9]

Moun ki viv selon prensip ki nan Bib la gen yon konsyans ki klè e yo gen yon relasyon ki pi solid ak fanmi yo.