▪ Byenke gen plizyè fason yo defini doktrin Trinite a, men youn nan definisyon yo bay pou li: “Bondye se twa pèsòn (Papa a, Pitit la ak Sentespri a), yo chak egziste pou toutan, yo toupisan, pa gen youn ki pi enpòtan pase lòt, yo chak se Bondye, epoutan yo toule twa ansanm egal yon sèl Bondye.” Èske se sa Labib anseye?

An jeneral, yo site Matye 28:19 pou apiye doktrin sa a. Men ki jan vèsyon ki rele Bib la mete pawòl Jezi te di a: “Ale fè disip pou mwen nan tout nasyon, batize yo nan non Papa a, Pitit la ak Sentespri a.” Se vre, nan vèsè sa a, yo pale de Papa a, Pitit la ak sentespri a (oswa lespri sen). Men, pa gen anyen nan vèsè a ki di yo se yon sèl. Jezi te bay disip li yo ki te Juif yon misyon pou yo anseye e pou yo batize moun nan non Papa a, nan non Pitit la ak nan non lespri sen an. Antanke nasyon, ki sa Juif yo te kwè?

Lè nasyon Izrayèl la te resevwa alyans Lalwa a, ki fè pati Labib, men lòd yo te resevwa: “Piga nou sèvi lòt bondye pase mwen menm sèlman.” ​(Detewonòm 5:7). Konbyen moun ki t ap pale la a? Men sa nou li nan Detewonòm 6:4 (NW) ki pa gen okenn konfizyon ladan l: “Tande, o Izrayèl: Jewova Bondye nou an se yon sèl Jewova.” Li pa yon dye an twa pèsòn. Izrayèl te fèk sot nan esklavaj ann Ejip, kote Osiris, Isis ak Oris (ki sou bò goch la) se te yon dye an twa pèsòn pami tout dye an twa pèsòn yo te konn adore ann Ejip yo. Se sa k fè Bondye te bay Izrayelit yo lòd pou yo adore yon sèl Dye. Poukisa li te enpòtan anpil pou moun yo te konprann kòmandman sa a? Selon Joseph H. Hertz, ki se yon raben, “pawòl estrawòdinè sa a ki mande se yon sèl Dye moun dwe adore se deklare yo te deklare lagè kont tout doktrin ki ankouraje adorasyon plizyè dye. [...] Chema a pa pran trinite a ki fè pati kwayans kretyen yo an konsiderasyon paske li depaman ak lide ki fè konnen Bondye se yon sèl Bondye *.”

Etandone Jezi se te yon Juif natif natal, yo te aprann li pou l suiv menm kòmandman sa a. Apre li te fin batize, men sa l te di lè Dyab la te tante l: “Al fè wout ou, Satan! Paske, men sa ki ekri: ‘Se Jewova, Bondye w la, ou dwe adore, e se li menm sèl ou dwe bay yon sèvis sakre.’” ​(Matye 4:10; Detewonòm 6:13). Gen omwen de bagay nou kapab aprann nan konvèsasyon sa a. Toudabò, Satan te eseye twonpe Jezi pou l fè l adore yon lòt moun olye li adore Jewova. Tantasyon sa a pa t ap gen sans si Jezi se te menm Bondye a. Ansuit, Jezi te montre aklè se yon sèl Dye moun dwe adore lè l te di “li menm sèl”, li pa t di “nou” e se sa l t ap di si l te fè pati yon Trinite.

Lè moun vin gen konesans egzak sou Bondye e yo vle sèvi l, yo batize “nan non Papa a, nan non Pitit la ak nan non lespri sen an”. (Matye 28:19.) Yo konprann otorite Jewova genyen sou yo ak wòl Jezi Kris jwe pou pèmèt Jewova atenn objektif li e yo aksepte sa (Sòm 83:18; Matye 28:18). Anplis de sa, yo konprann wòl lespri sen Bondye ki se fòs li itilize pou l aji e yo konprann travay li fè. — Jenèz 1:2; Galat 5:22, 23; 2 Pyè 1:21.

Sa fè plizyè syèk depi doktrin Trinite a ap lage moun nan konfizyon. Men, Jezi te fè disip li yo wè laverite klè e li te fè yo vin jwenn “sèl vrè Dye a”, Jewova. — Jan 17:3.

[Nòt anba paj]

[Liy kredi pou foto nan paj 31]

Musée du Louvre, vil Pari