SEKRÈ POU GEN KÈ KONTAN NAN YON FANMI
Ou kapab reyisi dezyèm maryaj ou
ÈMÀN: * “Premye madanm mwen te mouri ak kansè aprè 34 an maryaj. Lè m vin marye ak Linda, li te santi m toujou ap konpare l ak premye madanm mwen an. Sa k pi rèd la, tout ansyen zanmi m yo te toujou ap pale de bèl kalite premye madanm mwen an te genyen e sa fè Linda fache.”
LINDA: “Apre m te fin marye ak Èmàn, m te panse ni Èmàn ni lòt moun yo pap janm ban m menm valè ak premye madanm li an. Tout moun te tèlman renmen premye madanm li an! Li te konn pale byen ak moun e li te yon bon moun. Pafwa, m konn mande tèt mwen si m ap janm vin pwòch ak Èmàn menm jan ak premye madanm li an.”
Linda te divòse ak mari l e li menm ak Èmàn te byen kontan yo te rankontre. Sepandan, jan yo rekonèt sa, yon dezyèm maryaj ka pote difikilte ki pa t janm egziste nan premye maryaj la. *
Si w se yon moun ki remarye, ki jan w santi w parapò ak dezyèm maryaj la? Tamara se yon dam ki te remarye twazan apre li te fin divòse. Men sa l di: “Lè se premye maryaj ou, ou santi maryaj ou pral dire toutan. Men lè se dezyèm maryaj ou, ou ka pa santi menm bagay la, piske w deja konnen premye maryaj ou te kraze.”
Sepandan, gen anpil moun ki remarye ki jwenn vrè bonè a nan maryaj yo, yon bonè ki dire lontan. Yo fè maryaj yo reyisi. Ou kapab reyisi maryaj pa w la tou. Kòman w ka fè sa? Ann egzamine twa difikilte moun ki remarye yo konn rankontre e ann wè jan prensip ki nan Bib la ka ede yo fè fas ak difikilte sa yo. *
1ye DIFIKILTE: W AP LITE POU PREMYE MARYAJ OU PA ANPECHE W JWENN LAJWA NAN DEZYÈM MARYAJ OU.
Men sa Elèn k ap viv nan peyi Afrik disid di: “Mwen pa ka annik efase souvni premye maryaj la nan lespri m, sitou lè nou vwayaje pou n al menm kote m te konn al an vakans ak premye mari m nan. Pafwa m pa ka anpeche tèt mwen konpare dezyèm mari m nan ak premye a.” Yon lòt bò, si konjwen w te marye deja ou ka fache si l ap plede pale konsènan premye maryaj li.
Chèche gen lòt souvni k ap fè nou ini antanke mari ak madanm
YON SOLISYON: Ou bezwen aksepte reyalite sa a: Li pa nòmal pou w atann ou menm oubyen konjwen w ap annik bliye premye maryaj nou, sitou si nou te gen plizyè ane depi nou te marye ak moun nan. Anfèt, gen kèk moun ki admèt pafwa yo konn ap rele moun yo marye avè l kounye a, men se non ansyen konjwen yo a ki sot nan bouch yo san se pa espre yo fè. Ki jan w ka fè fas ak pwoblèm sa a oubyen ak lòt pwoblèm ki menm jan an? Men konsèy Bib la ban nou: “Se pou youn fè efò pou l konprann lòt.” — 1 Pyè 3:8, New Century Version.
Pinga jalouzi fè w entèdi konjwen w pale de premye maryaj li. Si konjwen w santi li nesesè pou l pale konsènan lavi li t ap mennen ak moun li te marye avè l anvan w lan, koute l avèk bonte e avèk konpasyon. Anplis de sa, pa prese di l ap konpare w ak premye konjwen l. Men sa Jan, ki te remarye sa gen dizan, te di: “Katlin, madanm mwen, pa janm konsidere sijè ki gen rapò ak premye madanm mwen an kòm yon sijè moun pa dwe pale. Okontrè, li wè sijè sa yo kòm yon mwayen pou l aprann konnen sa k fè m se moun mwen ye kounye a.” Ou ka menm rann ou kont konvèsasyon sa yo ap ede w vin pi pwòch nouvo konjwen w.
Reflechi sou bèl kalite konjwen ou gen kounye a genyen, kalite ki san parèy. Se vre, premye konjwen w lan ka te gen kèk kalite konjwen w gen kounye a pa genyen. Men, gen lòt domèn konjwen w gen kounye a ka pi fò ladan yo pase premye konjwen w lan. Se sa k fè, li pi enpòtan pou w chèche gen relasyon solid ak konjwen w, lè w reflechi sou sa k fè w renmen l, sa k fè w apresye l, olye pou w ap ‘konpare l ak yon lòt moun’. (Galat 6:4.) Gen yon mesye ki rele Edmon, ki marye de fwa, ki di: “Menm jan de amitye pa janm menm, se konsa tou de maryaj pa janm menm.”
Ki sa w ka fè pou w gen ekilib ant bèl souvni ou te gen nan premye maryaj ou ak lavi ou kòmanse ansanm ak nouvo konjwen w lan? Men sa Jak di: “Yon jou, m te di madanm mwen premye maryaj mwen te tankou yon bèl liv mwen menm ak premye madanm mwen an te ekri. Tanzantan, m ka ouvri liv sa a pou m li l, pou m reflechi sou bèl eksperyans nou te viv. Men, mwen pap viv nan liv sa a. Okontrè, mwen menm avè l ap ekri pwòp liv pa nou ansanm e se nan liv sa a m ap viv kounye a ak kè kontan.”
YON BAGAY OU KA FÈ: Mande konjwen w si l konn santi l jennen lè moun ap fè yon konvèsasyon epi yo vin ap pale sou premye maryaj ou. Chèche wè nan ki moman l ap pi bon pou n pa pale sou sijè konsa.
2yèm DIFIKILTE: W AP LITE POU ZANMI W GENYEN KI PA ABITYE AK NOUVO KONJWEN W LAN PA GEN MOVE EFÈ SOU LI.
Jisten, ki te marye sizan apre li fin divòse, te di: “Apre maryaj nou, pandan kèk tan, madanm mwen te panse gen kèk zanmi m k ap egzamine l e y ap teste l.” Gen yon mari ki rele Leyo ki te rankontre yon lòt pwoblèm. Men sa l rakonte: “Gen moun ki konn kanpe devan m y ap di madanm mwen jan yo te renmen premye mari l la, jan yo sonje l!”
YON SOLISYON: Eseye mete w nan plas zanmi w yo. Men sa Jan, mesye nou te pale de li pi wo a, te di: “Mwen panse pafwa ansyen zanmi m yo konn twouve li difisil anpil pou yo chita pale ak yon sèl moun nan de moun marye yo te konnen yo e yo twouve sa anbarasan.” Se sa k fè, ou bezwen ‘rezonab, montre yon dousè total anvè tout kalite moun’. (Tit 3:2.) Bay zanmi w ak fanmi w tan pou yo adapte yo. Etandone ou pa marye ak menm moun nan ankò, ou ka vin gen lòt zanmi tou. Jisten, mesye nou te mansyone pi wo a, te di, avèk letan, li menm ak madanm li te repran kontak ak ansyen zanmi yo te genyen yo. Men sa l di ankò: “Nou te fè efò pou nou gen nouvo zanmi, zanmi nou de a vin fè, e sa te ede nou tou.”
Lè w ap pase tan ak ansyen zanmi w, pran santiman konjwen w an konsiderasyon. Pa egzanp, si yo vin ap pale sou premye maryaj ou, ou bezwen gen tak ak bon jijman dekwa pou konjwen w pa santi ou mete l sou kote. Gen yon pwovèb nan Bib la ki di: “Si yon moun pale san reflechi, pawòl li ka blese moun tankou yon epe. Men moun ki gen sajès la veye sou sa l ap di. Pawòl li ka geri moun ki blese.” — Pwovèb 12:18, Holy Bible — Easy-to-Read Version.
YON BAGAY OU KA FÈ: Lè w pral nan yon aktivite sosyal kote ka gen konvèsasyon ki anbarase ou menm oubyen konjwen w, prepare w pou w konn sa w ap di. Pa egzanp, depi alavans, pale sou pi bon fason pou nou reponn kesyon zanmi nou ap poze sou premye maryaj nou oubyen pale sou sa nou ka di si yo ta fè kòmantè sou sa.
3yèm DIFIKILTE: W AP LITE POU W FÈ DEZYÈM KONJWEN W LAN KONFYANS, PASKE PREMYE A PA T FIDÈL.
Premye madanm Andre te kite l. Men sa Andre di: “Mwen te konn pè pou yon fi pa twonpe m ankò.” Kèk tan apre, li te marye ak Rita. Men sa li te di: “Byen souvan, m konn mande tèt mwen si m ap janm vin bon moun menm jan ak premye mari Rita a. Mwen konn menm pè pou l pa deside kite m pou yon lòt moun.”
YON SOLISYON: Santi w alèz pou w pale ak konjwen w sou sa ki enkyete w. Bib la di: “Lè ou pa pran konsèy, plan travay ou p’ap mache.” (Pwovèb 15:22). Finalman, bon konvèsasyon Andre te gen ak Rita te ede youn vin fè lòt konfyans. Men sa Andre di: “M te di Rita m pap janm chwazi divòs kòm yon solisyon fasil pou m rezoud pwoblèm nou genyen e Rita te di m menm bagay la tou. Avèk letan, m te vin fè l konfyans nèt.”
Si yo te twonpe konjwen w nan premye maryaj li, fè tout sa w kapab pou l rive fè w konfyans. Pa egzanp, Michèl ak Sabin, de moun ki te marye deja e ki divòse, te antann yo pou youn di lòt si yo te gen kontak ak ansyen konjwen yo. Sabin di: “Angajman sa a nou te pran an te fè nou santi nou an sekirite, nou pa t santi okenn danje.” — Efezyen 4:25.
YON BAGAY OU KA FÈ: Mete limit nan konvèsasyon ou gen ak moun ki pa menm sèks avè w, kit se fasafas, kit se nan telefòn, kit se sou Entènèt.
Gen anpil moun ki reyisi dezyèm maryaj yo. Pa w la ka reyisi tou. Anfèt, petèt kounye a ou konn tèt ou pi byen pase premye fwa ou te marye a. Men sa Andre, nou te pale de li pi wo a, di: “Maryaj mwen menm ak Rita pote gwo rekonfò pou mwen. Apre 13 an maryaj, nou gen bon relasyon youn ak lòt, yon relasyon nou pa ta janm renmen pèdi.”
^ § 3 Yo chanje non moun yo.
^ § 5 Natirèlman, lanmò yon konjwen pa mete fen nan yon maryaj menm jan ak yon divòs. Yo fè atik sa a pou ede moun ki nan sitiyasyon sa yo reyisi dezyèm maryaj yo.
^ § 7 Pou w jwenn plis enfòmasyon sou difikilte ki konn genyen lè moun ap leve timoun ki pitit konjwen yo, gade seri atik ki te parèt nan Réveillez-vous! avril 2012. Ki te gen tit: “Des familles recomposées épanouies.” Se Temwen Jewova ki pibliye l.
MANDE TÈT OU...
Ki bèl kalite konjwen m genyen ki gen anpil enpòtans pou mwen?
Si yo kòmanse yon konvèsasyon sou premye maryaj mwen, ki jan m ka dirije konvèsasyon an pou m bay konjwen m asirans e pou m respekte diyite l?
Lòt sijè ki enteresan
FANMI W KA GEN KÈ KONTAN
Se pou nou fidèl youn ak lòt
Èske lefètke yon moun pa fè adiltè sa vle di l fidèl pou sa?
TOUDEGAD
Lavi w pa fini apre w fin divòse
Prèske tout moun ki divòse twouve lavi a pi difisil pase sa yo te panse. Bib la bay bon konsèy ki ka ede w reyisi.
FANMI W KA GEN KÈ KONTAN
Lè n ap rezoud pwoblèm
Atitid nou ka pèmèt yon maryaj vin djanm epi bay kè kontan oswa fè l vin fèb epi pote chagren.
