Mwen grandi Warialda, yon ti vil ki nan Nouvèl Gal disid. Se yon kote moun yo renmen fè elvaj mouton ak lòt bèt, yo fè manje angren e yo kiltive lòt kalite plant moun ka manje men ki pa fè twò gwo pyebwa. Vil la pwòp e moun pa konn fè twòp move zak ladan l.

Fanmi m te gen dis pitit e se mwen ki te pi gran. Depi a 13 an m te kòmanse travay pou m ka soutni fanmi an. Etandone m pa t fè gwo klas, mwen te travay yon kote yo te konn fè jaden e yo te pran swen bèt. Lè m vin gen 15 an, m te travay yon lòt kote, m te konn gade bèt e m te konn donte cheval.

Se vre, mwen te jwenn byenfè nan travay la, men li te gen move kote tou. Mwen te vrèman renmen travay mwen t ap fè a ak zòn travay la te ye a. Leswa mwen te konn chita deyò bò yon boukan dife e mwen t ap gade lalin nan ak syèl la ki chaje ak zetwal. Anplis de sa mwen te ka tande van an k ap soufle nan pil pyebwa ki toupatou nan zòn nan e ki pote yon bon ti sant. M te vin konprann dwe gen yon Moun ki kreye tout bèl bagay sa yo. Yon lòt bò, mwen te ekspoze anba anpil move enfliyans kote m t ap travay la. Byen souvan, m te konn tande moun k ap di vye mo e m te ka jwenn sigarèt byen fasil. Sa pa t pran tan pou m te lage kòm nan fimen e m te vin ap di vye mo tou.

Lè m te gen 18 an, mwen te demenaje al Sydney. M te eseye antre nan lame men yo pa t aksepte paske m pa t fè gwo klas. M te vin jwenn yon travay e m te ret nan vil la pandan yon ane. Se nan epòk sa a mwen te rankontre ak Temwen Jewova yo pou premye fwa. Yo te envite m nan yon reyinyon yo t ap fè e m te ale, menm kote a m te rekonèt se yo menm ki t ap anseye laverite.

Sepandan, yon ti tan apre sa, mwen te deside tounen nan zòn mwen te fèt la. Apre sa, mwen te vwayaje al Queensland nan yon vil ki rele Goondiwindi. Mwen te jwenn yon travay,  mwen te marye men malerezman mwen te kòmanse bwè.

Mwen menm ak madanm mwen te gen de pitit gason. Lè timoun yo fin fèt, mwen te kòmanse reflechi toutbon sou direksyon m ap bay lavi m. M te sonje sa m te tande nan reyinyon Temwen Jewova yo te envite m nan vil Sydney a, e m te deside fè yon jan ak lavi m.

Mwen te jwenn yon ansyen Toudegad ki gen adrès filyal Temwen Jewova yo nan peyi Ostrali. M te ekri yo yon lèt pou m mande yo èd yo. Yo te voye yon Temwen ki renmen moun e ki janti vin vizite m. Li te kòmanse etidye Labib avè m tousuit.

Toutpandan mwen t ap etidye Bib la, m te rann mwen kont mwen bezwen fè gwo chanjman nan lavi m. Yon vèsè nan Bib la ki te touche m anpil se 2 Korentyen 7:1. Vèsè sa a ankouraje nou pou n “pirifye tèt nou anba tout sa ki ka sal kò a”.

Mwen te deside m ap kite fimen e m pap bwè twòp ankò. Li pa t fasil pou m fè chanjman sa yo nan lavi m paske sa fè lontan mwen te gen move abitid sa yo. M te detèmine pou m viv yon fason ki fè Bondye plezi. Sa ki te ede m plis, se lè m te aplike prensip ki nan Women 12:2 a ki di: “Sispann konfòme nou ak sistèm sa a, men transfòme tèt nou, lè nou bay lespri nou yon lòt direksyon.” Mwen te rann mwen kont pou m rive chanje abitid mwen genyen yo, li te nesesè pou m chanje fason m panse e pou m wè abitid sa yo menm jan Bondye wè yo, sa vle di kòm bagay ki nuizib. Grasa èd Bondye, m te rive kite fimen e m te sispann bwè twòp.

Sepandan, sa k te pi difisil pou mwen, se sispann di vye mo. M te konnen konsèy Bib la bay nan Efezyen 4:29 la ki di: “Pa kite okenn pawòl pouri sot nan bouch nou.” Malgre sa, mwen pa t reyisi sispann di vye mo tousuit. Mwen te konn medite sou Izayi 40:26 e sa te itil mwen. Anpalan de zetwal ki nan syèl la, men sa vèsè sa a di: “Leve tèt nou gade syèl la. Ki moun ki kreye tout zetwal sa yo? Tankou nan yon lame, li bay yo chak plas yo. Li bay yo tout non, li konn non yo chak. Yonn pa janm manke nan syèl la! Li gen gwo pouvwa, li gen anpil fòs.” Mwen te fè rezònman sa a, si Bondye gen pouvwa pou l kreye gwosè linivè sa a, yon bagay mwen tèlman renmen gade, m sèten li kapab ban m fòs pou m chanje dekwa pou m fè l plezi. Ti kras pa ti kras, mwen te rive kontwole pawòl m ap di paske m te priye anpil e m te fè gwo efò pou m chanje.

Mwen pa t gen anpil okazyon pou m pale ak moun paske nan zòn mwen t ap travay la pa t gen anpil moun. Men, grasa fòmasyon mwen te jwenn nan reyinyon Temwen Jewova yo, mwen te aprann kòman pou m pale ak moun. Anplis de sa, fòmasyon sa a te fè m vin anmezi pou m pale ak lòt moun sou bon nouvèl Wayòm nan. — Matye 6:9, 10; 24:14.

Pandan ane ki pase yo, mwen kontan sèvi kòm ansyen nan kongregasyon an. Mwen konsidere se yon privilèj pou m fè tout sa m kapab pou m ede kwayan parèy mwen yo.

Mwen remèsye Jewova lefètke l kite yon moun tankou m ki pa fè gwo klas resevwa ansèyman nan men l (Izayi 54:13). Mwen toutafè dakò ak pawòl ki nan Pwovèb 10:22 a ki di: “Benediksyon Bondye bay moun richès.”