“Moun ki pa ka padone lòt moun koupe pon pou yo pase a”. Se Edward Herbert, yon istoryen britanik ki t ap viv nan 17^yèm syèk la, ki te di Pawòl sa yo, pou l montre youn nan rezon ki fè nou dwe padone lòt moun, se paske towouta n ap bezwen moun padone nou (Matye 7:12). Sepandan, gen yon rezon ki pi enpòtan ki fè nou dwe padone lòt moun. Gade sa apot Pòl di nan Kolosyen 3:13. — Li vèsè a.

Piske nou tout enpafè, pafwa nou ka fè lòt moun fache oubyen nou ka ofanse yo e yo menm tou yo ka fè nou menm bagay la (Women 3:23). Ki sa nou ka fè pou n toujou anpè ak pwochen nou? Bondye te enspire apot Pòl pou l konseye nou pou n sipòte lòt moun e pou n padone yo. Konsèy sa a vrèman itil jodi a menm jan l te itil nan epòk Pòl te ekri l la sa gen prèske de mil an. Ann egzamine pawòl Pòl te di yo pi an detay.

“Se pou youn kontinye sipòte lòt.” Ekspresyon grèk lè yo tradui l ki bay “kontinye sipòte” a gen sans toleran oubyen pasyan. Gen yon liv referans ki di, kretyen yo montre yo gen kalite sa a lè yo “dispoze tolere moun ki fè yon bagay ki fè yo fache oubyen moun ki gen yon tanperaman ki irite yo”. Ekspresyon ‘youn lòt’ la montre se nou youn ki dwe tolere lòt. Sa vle di, lè nou sonje nou menm tou nou gen defo lakay nou ki ka fè lòt moun fache, nou pap kite bagay nou pa renmen lakay lòt moun detwi lapè ki gen nan mitan nou. Men, ki sa nou ka fè si yon moun fè nou yon bagay ki fè nou fache?

“Se pou youn kontinye padone lòt ak tout kè nou.” Dapre sa yon biblis di, mo grèk lè yo tradui l ki bay “ak tout kè nou” an, se pa mo yo konn itilize ki vle di pase sou fot yon moun fè oubyen padone l la [...]. Men se yon mo ki gen yon sans ki pi laj toujou. Li mete aksan sou bon dispozisyon yon moun dwe genyen pou l padone lòt moun”. Gen yon lòt liv ki fè konnen mo sa a ka vle di “bay yon bagay avèk plezi, fè yon moun favè, fè yon bagay ki nan enterè lòt moun”. Nou montre nou gen mizèrikòd lè nou padone lòt moun san grate tèt menmsi ‘nou gen dekwa pou nou plenyen kont yon lòt moun’. Sepandan, poukisa nou dwe dispoze fè yon moun yon favè konsa? Youn nan rezon yo, se paske anvan lontan n ap bezwen moun sa a ki te fè nou fache a fè nou favè tou lè li padone nou.

“Menm jan Jewova padone nou ak tout kè l, nou menm tou nou dwe fè menm jan an.” Men pi gwo rezon ki fè nou dwe padone moun ak tout kè nou: Jewova padone nou ak tout kè l (Mika 7:18). Reflechi sou gwo favè Jewova fè moun ki repanti yo. Kontrèman ak nou, Jewova pa konn peche. Poutan, li dispoze padone moun ki repanti yo totalman, menmsi li konnen li pap janm bezwen moun sa yo fè l favè, sa vle di pou yo ta padone l. Vrèmanvre, Jewova se pi bèl egzanp nan domèn padone moun ki repanti yo ak tout kè l!

Mizèrikòd Jewova gen lakay li fè nou pwoche kote l e li fè nou vle imite l (Efezyen 4:32–5:1). Li bon pou nou poze tèt nou kesyon sa a: ‘Piske Jewova padone m ak tout kè l, poukisa pou m ta refize padone yon moun enpafè parèy mwen ki repanti toutbon paske l te fè yon bagay ki fè m fache?’ — Lik 17:3, 4.