Lè n ap li sa Bib la di sou Satan, li fasil pou moun di Satan se jis yon senbòl ki reprezante tout sa ki mal. Men, èske se sa Bib la anseye toutbonvre? Si se ta sa, poukisa Bib la di Satan te pale ni ak Jezi Kris ni ak Bondye Toupisan an? Ann egzamine de egzanp nan konvèsasyon sa yo.

Lè Jezi te kòmanse ministè l, Dyab la te eseye tante l twa fwa. Toudabò, Satan te fè tout sa l kapab pou l fè presyon sou Jezi pou Jezi sèvi ak pouvwa Bondye te ba li a yon fason egoyis pou l bay tèt li manje nan yon moman kote l te grangou. Ansuit, Dyab la te bay Jezi yon defi, li te mande Jezi pou l fè yon aksyon ensanse kote l t ap riske lavi l pou l ka atire atansyon sou tèt li. Finalman, Satan te di Jezi l ap ba l pouvwa sou tout wayòm ki nan monn nan akondisyon Jezi fè yon ti jès adorasyon devan l. Jezi te rejte toule twa atak sounwa Satan te fè yo, a chak fwa li te site Ekriti yo. — Matye 4:1-11; Lik 4:1-13.

Ak ki moun Jezi t ap pale a? Èske l t ap pale ak yon move bagay ki nan li ki t ap pouse l fè sa ki mal? Dapre Bib la, Jezi ‘te pase anba eprèv nan tout domèn, menm jan avèk nou, men li san peche’. (Ebre 4:15.) Bib la di tou: “Li pa t fè peche, e yo pa t jwenn twonpri nan bouch li.” ​(1 Pyè 2:22). Jezi te toujou pafè, li te rete entèg jiska lafen. Li pa t janm gen okenn defo nan li. Sa klè, Jezi pa t ap pale ak yon move bagay ki nan li, men, li t ap pale ak yon pèsòn reyèl.

Konvèsasyon sa a ban nou lòt prèv ki montre Satan se yon pèsòn reyèl.

• Sonje Dyab la te ofri Jezi tout wayòm ki nan monn nan akondisyon Jezi te fè yon jès adorasyon devan l (Matye 4:8, 9). Òf sa a pa t ap gen sans si Satan pa t yon pèsòn reyèl. Mete sou sa, Jezi pa t konteste kokenn otorite Satan te di l genyen sou monn nan.

• Apre Jezi fin rejte tantasyon yo, Dyab la te “kite l annatandan l jwenn yon lòt bon okazyon”. (Lik 4:13.) Nan ka sa a, èske Satan se yon move bagay Jezi gen nan li ki t ap pouse l fè sa ki mal oubyen èske Satan se yon advèsè ki pèsistan e ki detèmine pou l atenn objektif li?

• N ap remake ‘gen zanj ki te vini, e yo te kòmanse ede’ Jezi (Matye 4:11). Èske zanj sa yo se te kreyati espirityèl ki reyèl ki t ap ankouraje Jezi e ki t ap ba li bonjan èd? Li klè, se sa yo te ye. Kounye a, poukisa pou n ta di Satan pa yon kreyati espirityèl ki reyèl, men, se yon lòt bagay li ye?

Nou jwenn dezyèm egzanp lan nan istwa Jòb la. Jòb se yon moun ki te gen lakrentif pou Bondye. Nan istwa sa a nou jwenn de konvèsasyon ki te genyen ant Dyab la ak Bondye. Nan toule de konvèsasyon yo, Bondye te fè lwanj pou Jòb paske l te entèg. Satan te fè konnen Jòb t ap sèvi Bondye pou rezon ki egoyis sèlman, kòmkwa Bondye t ap achte fidelite Jòb. Anfèt, Dyab la te di li pi byen konnen Jòb pase Bondye. Jewova te kite Satan pran tout byen Jòb te genyen yo, pitit li yo te mouri e li te menm pèdi sante l *. Rive yon lè, sa te parèt klè se Jewova ki te di laverite sou Jòb, e Satan te pwouve li se yon mantè. Bondye te beni Jòb pou entegrite l. — Jòb 1:6-12; 2:1-7.

Nan konvèsasyon sa yo Jewova te gen ak Satan, èske Jewova t ap pale ak yon bagay mal ki nan li? Men sa Bib la di: “Bondye o! Tou sa ou fè bon nèt ale.” ​(2 Samyèl 22:31). Anplis de sa, Pawòl Bondye a fè konnen: “Jewova Dye, li menm ki Toupisan an, [...] li sen, li sen, li sen.” ​(Revelasyon 4:8). Mo sen an vle di pwòp, sakre, san peche. Jewova pafè e li san defo. Li pa ka gen okenn tras mechanste nan li.

Malgre sa, gen kèk moun ki ka di menm Jòb pa t yon moun reyèl, donk, pou moun sa yo tout konvèsasyon an te yon parabòl. Men, èske agiman sa a fè sans? Gen lòt vèsè nan Bib la ki montre Jòb te yon moun reyèl. Pa egzanp, nan Jak 5:7-11, yo site Jòb kòm yon egzanp pou ankouraje kretyen yo andire nan moman difisil yo, pou rekonfòte yo e pou fè yo sonje Jewova ap rekonpanse moun ki demontre kalite andirans sa a. Ki enpòtans egzanp sa a t ap genyen si Jòb pa t yon moun reyèl e si atak Satan yo te sèlman yon seri atak yo envante? Mete sou sa, nan Ezekyèl 14:14, 20, yo site Jòb ansanm ak Noye ak Dànyèl nan yon lis twa moun ki jis. Menm jan ak Noye ak Dànyèl, Jòb te yon moun reyèl, yon moun ki te gen yon gwo lafwa. Si Jòb te yon moun reyèl, èske moun ki t ap atake l la, sètadi moun ki te lakòz li jwenn tout pèsekisyon sa yo, pa ta dwe reyèl tou?

Li klè, Bib la pale de Satan kòm yon kreyati espirityèl ki reyèl. Men, ou ka ap mande tèt ou: ‘Èske Satan reprezante yon danje pou mwen menm ak fanmi m nan monn n ap viv jodi a?’

Imajine gen yon gwoup kriminèl ki anvayi vil kote w ap viv la sanzatann. Se sèten, sekirite ak nivo moralite moun yo t ap bese nan zòn nan. Kounye a, ann konsidere senaryo sa a ki sanble ak egzanp nou sot pran an: Yo pimpe Satan ak demon yo sou tè a sanzatann. Demon yo se yon seri kreyati espirityèl ki reyèl ki rebele kont Bondye menm jan ak Satan. Ki rezilta sa t ap bay? Ebyen, reflechi sou sa w wè nan nouvèl sou sa k ap pase bò lakay ou ak nan lòt peyi yo.

• Èske w pa wè jan move zak ak vyolans ap ogmante nan monn nan malgre efò y ap fè toupatou pou yo stope zak sa yo?

• Èske w pa wè jan divètisman ki gen rapò ak movèzespri ap ogmante malgre enkyetid anpil paran genyen sou sa?

• Èske w pa wè jan anviwònman an ap degrade tikras pa tikras malgre bonjan efò y ap fè pou yo pwoteje l?

• Èske w pa wè sosyete nou an sanble gen yon bagay ki vrèman grav ladan l, gen yon fòs k ap pouse lèzòm nan yon katastwòf?

Tanpri gade kiyès Bib la di ki dèyè tètchaje ki gen nan epòk nou an: “Yo pimpe gwo dragon an sou tè a, li menm ki premye sèpan an, li menm yo rele Dyab la e yo rele Satan an, li menm k ap twonpe lemonnantye a. Yo pimpe l sou tè a, e yo pimpe zanj li yo sou tè a avèk li. [...] Malè pou tè a ak lanmè a, paske Dyab la desann vin jwenn nou. Li an kòlè anpil, paske li konnen se yon tikras tan li rete.” ​(Revelasyon 12:9, 12). Apre anpil moun fin egzamine prèv sa yo, yo dakò Satan se yon kreyati espirityèl ki danjere, yon kreyati ki gen yon kokenn enfliyans sou monn nan.

Petèt w ap mande tèt ou ki sa w ka fè pou w jwenn pwoteksyon kont li. Se yon kesyon ki gen anpil enpòtans. Pwochen atik la ap ba ou bonjan èd sou kesyon sa a.