Megàn: Bonjou Chèli. Mwen te byen kontan wè w nan Memoryal lanmò Jezi Kris semèn pase *. Ki sa w panse de reyinyon an?

Chèli: Mwen te byen kontan asiste Memoryal la, men fò m admèt se pa tout bagay yo te di mwen te byen konprann. Mwen konnen anpil moun fete nesans Jezi lè fèt Nwèl e yo fete rezirèksyon l lè fèt Pak, men mwen pa konprann poukisa li enpòtan pou nou komemore lanmò Jezi, èske w ka esplike m sa ankò?

Megàn: Se vre, Nwèl ak Pak se de fèt moun fete toupatou nan monn nan. Men Temwen Jewova yo panse li enpòtan pou yo komemore lanmò Jezi. Si w gen kèk minit m ap kontan montre w pou ki rezon yo fè sa.

Chèli: Mèwi m gen kèk minit.

Megàn: Rezon prensipal ki fè Temwen Jewova yo komemore lanmò Jezi se paske Jezi te bay disip li yo lòd pou yo fè sa. Ann egzamine sa k te pase nan nuit anvan Jezi te mouri a. Èske w konn tande pale de yon repa espesyal Jezi te pran ak disip li yo ki fidèl?

Chèli: Ou vle di Dènye Soupe a?

Megàn: Wi se sa, yo rele repa sa a Soupe Seyè a tou. Pandan repa a, Jezi te bay disip li yo kèk enstriksyon byen klè. Silvouplè, èske w vle li pawòl li te di yo nan Lik 22:19?

Chèli: Oke. vèsè a di: “Epi, li pran yon pen, li di Bondye mèsi, li kase l, li ba yo l, epi li di: ‘Sa a reprezante kò m mwen pral bay pou nou. Kontinye fè sa pou nou montre nou sonje m.’”

Megàn: Mèsi. Ou wè enstriksyon Jezi te bay nan dènye fraz nan vèsè a: “Kontinye fè sa pou nou montre nou sonje m.” Epi tousuit anvan li te bay disip li yo lòd pou yo sonje l la, yon fason klè, li te montre yo sa yo dwe sonje sou li. Li te di li pral bay lavi l pou disip li yo. Jezi te eksprime ide sa a nan pawòl ki nan Matye 20:28 la. Men sa nou li nan vèsè a: “Pitit lòm nan pa t vini pou moun sèvi l, men li te vini pou l sèvi moun e pou l bay nanm li kòm ranson pou anpil moun.” Kidonk, Temwen Jewova yo reyini chak ane nan dat anivèsè lanmò Jezi a pou yo ka sonje sakrifis Jezi te bay kòm ranson pou yo a. Lanmò Jezi ka vle di lavi pou tout moun ki obeyisan.

Chèli: Mwen konn tande moun di Jezi te mouri pou nou ka gen lavi. Men, pou m fran avè w mwen pa vrèman konprann kòman sa fè posib.

Megàn: Se pa ou sèlman ki pa konprann Chèli. Sijè sou sakrifis Jezi te bay kòm ranson an se yon sijè ki pwofon anpil. Men tou, se youn nan verite ki pi bèl ki gen nan Pawòl Bondye a. Bon, èske w gen yon ti tan toujou?

Chèli: Mwen gen kèk minit ankò.

 Megàn: Se byen. Mwen fèk sot li yon sijè sou ranson an, m ap eseye esplike w li yon fason ki senp.

Chèli: Oke.

Megàn: Pou nou ka konprann sijè sou ranson an toudabò nou dwe byen konprann pwoblèm Adan ak Èv te lakòz lè yo te peche nan jaden Edenn nan. Pou ede nou konprann pwoblèm ki genyen an, ann li Women 6:23 ansanm. Èske w vle li vèsè a?

Chèli: Mèwi. Li di: “Sa yon moun jwenn pou peche l fè se lanmò, men kado Bondye bay se lavi ki pap janm fini an grasa Kris Jezi, Seyè nou an.”

Megàn: Mèsi. Ann egzamine pawòl sa yo. Toudabò, w ap remake jan vèsè a kòmanse: “Sa yon moun jwenn pou peche l fè se lanmò.” Se yon lwa tou senp Bondye te etabli depi nan kòmansman listwa lèzòm. Sa yon moun jwenn oubyen pinisyon pou peche se lanmò. Natirèlman, okòmansman pa t gen moun ki te peche. Bondye te kreye Adan ak Èv pafè, e tout pitit yo t apral genyen t ap fèt pafè tou. Kidonk, pa t ap gen okenn rezon pou yon moun mouri. Adan ak Èv, ak tout desandan yo, te gen posiblite pou yo viv pou toutan ak kè kontan. Men jan ou deja konn sa, bagay yo pa t pase konsa, pa vre?

Chèli: Non, Adan ak Èv te manje fwi Bonye te entèdi yo manje a.

Megàn: Se sa. E lè Adan ak Èv te fè sa, sa vle di yo te chwazi dezobeyi Bondye, yo te mouri. Anfèt, yo te chwazi pou yo vin enpafè, pou yo vin pechè. Nonsèlman chwa Adan ak Èv te fè a t ap gen move konsekans pou yo, men li t ap gen move konsekans pou tout desandan yo tou.

Chèli: Sa w vle di?

Megàn: Bon, pou pi byen konprann, kite m pran yon egzanp. Èske w renmen fè pen?

Chèli: Wi! Mwen renmen fè sa.

Megàn: Ann sipoze ou fèk achte yon bèl moul pou w fè pen. Epi ou pa gentan sèvi ak li menm yon fwa, li sot tonbe e li gen yon gwo kolboso. Ki sa k ap rive chak pen ou fè nan moun lan? Èske yo pap gen menm mak kolboso a tou?

Chèli: Wi, y ap genyen l.

Megàn: Se menm jan an an tou, lè Adan ak Èv te chwazi dezobeyi Bondye, yo te vin “kolboso” oubyen yo te vin gen yon mak akoz peche ak enpèfeksyon. E piske yo te peche anvan yo fè pitit, tout pitit yo t apral fè t ap gen menm “kolboso” a. Yo tout nèt t ap fèt ak peche. Nan Bib la, mo “peche” a pa fè referans ak yon aksyon sèlman men li gen rapò ak kondisyon nou eritye akoz peche a tou. Rezilta final la sèke malgre ou menm avè m pa t fè anyen ki mal, nou potko menm fèt lè Adan ak Èv te peche a, ni nou menm ni tout desandan Adan ak Èv t apral genyen yo te kondane pou yo viv nan enpèfeksyon ak nan peche, de bagay k ap mennen nou nan lanmò. Jan nou li sa nan Women 6:23, pinisyon yon moun jwenn pou peche l fè se lanmò.

Chèli: Sa pa sanble jis. Poukisa tout moun oblije soufri akoz peche Adan ak Èv te fè a?

Megàn: Ou gen rezon, li pa sanble jis vre. Men gen plis bagay pou nou konsidere toujou. Piske Bondye gen yon jistis ki pafè, li te deside Adan ak Èv dwe mouri pou peche yo te fè a, men, Bondye pa t lage nou menm ki desandan yo san espwa. Li te fè yon jan pou l retire nou nan sitiyasyon difisil nou ye a. Se la nou vin bezwen sakrifis Jezi te bay kòm ranson an. Gade Women 6:23 a ankò. Apre vèsè a fin di “sa yon moun jwenn pou peche l fè se lanmò”, li di “men kado Bondye bay se lavi ki pap janm fini an grasa Kris Jezi, Seyè nou an”. Donk, se lanmò Jezi ki ouvri wout pou n libere anba peche ak lanmò *.

Megàn: Gen yon lòt detay nan vèsè a mwen ta renmen atire atansyon w sou li.

Chèli: Ki sa l ye?

Megàn: Remake sa vèsè a di: “Kado Bondye bay se lavi ki pap janm fini an grasa Kris Jezi, Seyè nou an.” Bon, si se Jezi ki soufri pou nou e ki mouri pou nou, se li menm ki bay lavi l pou nou, poukisa vèsè a pale de ranson an kòm yon “kado Bondye bay”? Poukisa li pa di se yon “kado Jezi bay” *?

Chèli: Hmm. M pa konnen.

Megàn: Ebyen, se Bondye ki te kreye Adan ak Èv, e se kont Bondye yo te peche lè yo te dezobeyi l nan jaden Edenn nan. Sa dwe te fè l mal anpil lè de premye pitit li yo te rebele kont li. Men, menm kote a Jewova te tou bay yon solisyon * pou pwoblèm nan. Li te deside pou youn nan kreyati espirityèl yo vin sou tè a, pou l viv antanke moun pafè, e finalman pou l bay lavi l kòm sakrifis. Kidonk, vrèmanvre, se Bondye ki te pran tout dispozisyon pou li bay ranson an, se sa k fè ranson an se yon kado Bondye bay. Gen yon lòt fason ankò ranson an se yon kado Bondye bay. Èske w konn reflechi sou sa Bondye dwe te santi lè yo te touye Jezi?

Chèli: Non, mwen pa konn reflechi sou sa.

Megàn: Mwen wè kèk jwèt nan lakou ki devan an. Ou dwe gen timoun.

Chèli: Wi mwen gen de pitit. Yon gason, yon fi.

Megàn: Antanke paran, pran yon ti tan epi reflechi sou jan Papa Jezi ki nan syèl la, Jewova Dye, dwe te santi l jou Jezi te mouri a. Mwen vle di, ki jan li te santi l, kote li ye nan syèl la, lè l t ap gade jan yo arete Pitit li renmen anpil la, yo pase l nan rizib, yo ba l kout pwen? Epi ki jan Papa a te santi l lè yo te kloure Pitit li a sou poto a epi yo te kite l la pou l mouri antife, yon lanmò terib?

Chèli: Li dwe te santi sa fè l mal anpil. Mwen pa t janm reflechi sou sa anvan!

Megàn: Anfèt, li enposib pou n di jan Bondye te santi l egzakteman jou sa a. Men, nou konnen li gen santiman, mete sou sa, nou konnen poukisa li kite tout bagay sa yo rive. Gen yon vèsè moun byen konnen ki byen esplike nou rezon an, se Jan 3:16. Èske w vle li l pou mwen?

Chèli: Wi, li di: “Bondye tèlman renmen monn nan, li bay sèl Pitit li fè a pou li, dekwa pou nenpòt moun ki demontre l gen lafwa nan li pa detwi, men pou l gen lavi ki pap janm fini an.”

Megàn: Mèsi. Gade kòmansman vèsè a ankò. Li di: “Bondye tèlman renmen monn nan.” Se pwen kle a sa: lanmou. Se lanmou Bondye gen pou nou ki pouse l voye Pitit li a sou tè a pou l te ka mouri pou nou. Vrèman, sakrifis Jezi te bay kòm ranson an se pi gwo fason Bondye montre lanmou li pou nou, pyès moun pa janm demontre yon gwo lanmou konsa. Se evènman sa a Temwen Jewova yo reyini chak ane pou yo komemore jou anivèsè lanmò Jezi a. Èske ti revizyon sa a te itil ou?

Chèli: Wi. Li itil mwen anpil. Mèsi poutèt ou te pran tan pou w esplike m tout bagay sa yo.