Nan dat ki te 2 avril 2022 a, frè Alberto Rovira, yon manm komite filyal peyi Espay, te fè konnen Tradiksyon monn nouvo a parèt nan lang katalan sou fòma elektwonik. Temwen ki pale katalan ki nan Andò ak nan plizyè lòt kote ann Espay, tankou zile Baleya yo, Katalòy ak Valans, te suiv yon pwogram espesyal sou JW Stream, kote te gen plis pase 3 000 koneksyon. Nan mwa k ap vini yo, nouvo tradiksyon Labib sa a ap disponib pou kongregasyon yo sou fòma enprime.

Depi nan 13^yèm syèk la, gen tradiktè ki te konn tradui Bib la nan lang katalan, e yo te soti plizyè tradiksyon Labib. Yo te pibliye youn nan tradiksyon san parèy Bib la nan lang katalan ant ane 1282 ak ane 1325. Se yon tradiksyon Labib ki gen kèk pati ki sot nan 18 liv nan Bib la sou fòm pwezi, sa ki fè l fasil pou moun sonje yo.

Anpil tradiksyon Labib ki disponib nan lang katalan itilize yon seri ansyen mo ki difisil pou lektè yo konprann. Gen lòt tradiksyon menm ki retire non Bondye nan Bib la, oswa sa ki di ladan yo pa egzak.

Men sa frè Rovira te esplike pandan pwogram nan: “Nou ka gen konviksyon tradiksyon Labib sa a byen transmèt panse Bondye yo nan lang manman nou.”

Nou kontan paske moun ki pale katalan yo ap kapab byen pwofite pouvwa Pawòl Bondye a genyen an. — Ebre 4:12.