Nan dat 7 desanm 2022 a, biwo tradiksyon nan lang venda a te kòmanse fonksyone nan Makado, nan peyi Afrik disid. Ekip tradiksyon an gen 10 moun k ap travay aplentan ak 8 moun k ap travay amitan.

Gen anviwon 1, 2 milyon moun ann Afrik disid ki pale venda ak 100 000 lòt nan peyi Zimbabwe. Pou kounye a, gen 28 kongregasyon lang venda nan 2 peyi sa yo ki gen 800 pwoklamatè.

Lokal la te deja gen yon kay ladan l yo renove pou fè l tounen 4 apatman. Yo te konstwi yon nouvo bilding kòm biwo tradiksyon. Yo te achte 3 lòt apatman toupre a pou yo te ka gen plis espas.

Yo te fè biwo tradiksyon an yon fason ki adapte ak klima zòn nan. Pa egzanp, men sa frè Jody Palvie, ki te travay kòm siveyan pwojè a ak Depatman plan ak konstriksyon an, te di: “Pou n te ka konbat gwo chalè ak imidite ki gen nan zòn nan, nou pa t koupe gwo pyebwa ki gen gwo fèy ki te deja la k p bay frechè, nou te itilize seramik anpil e nou te glasiye atè nan bilding yo pou yo te ka kenbe frechè.”

Kote biwo tradiksyon an ye a pèmèt ekip tradiksyon an gen plis kontak dirèk ak moun ki pale venda. Men sa yon tradiktè di: “Kounye a, nou ka pale ak moun ki pale venda yo chak jou. Sa ap fè nou vin pi abil nan tradiksyon nou e n ap ka itilize mo ak ekspresyon moun yo itilize chak jou nan aktivite yo.” Men sa yon lòt tradiktè di: “Kounye a, nou vin pi pre frè ak sè ki pale venda ki kapab bay vwa pou anrejistreman piblikasyon odyo ak videyo yo.”

Nou konnen Jewova ap kontinye beni efò frè ak sè sa yo k ap fè tout sa yo kapab pou yo “fè louwanj pou Jewova” pami moun ki pale venda yo. — Sòm 145:21.