Janvye 2024 la fè 75 an depi yo te pibliye premye Toudegad nan lang zoulou. Sa te kòmanse an 1949, yo te enprime kopi Toudegad yo nan lang zoulou nan filyal Afrik disid la grasa yon machin yo te mànye alamen pou fè kopi. Finalman, filyal la te vin jwenn yon près pou yo enprime, e kòm rezilta, yo te vin ka pwodui plis peryodik e yo te pi bon kalite.

Youn nan gwo pwoblèm yo te genyen depi okòmansman, se te jwenn yon kote ki apwopriye pou yo fè tradiksyon nan lang zoulou. Paske lwa ki te gen nan sistèm apated la nan Afrik disid te entèdi moun nwa ak moun blan rete menm kote. Tradiktè lang zoulou ki nwa yo te oblije al viv nan lòt kay ki deyò Betèl la. Byen souvan, sa te fè yo pran plis tan pou yo deplase, sa te lakòz lòt depans ak lòt pwoblèm ankò. Pa egzanp, gen yon lè, te gen 20 tradiktè lang zoulou nan yon sèl chanm kay. Frè Alfred Phatswana te pami moun ki te andire moman difisil sa yo pandan dezan, sa ki te kòmanse nan ane 1981. Jodi a, antanke yon manm komite filyal Afrik disid la, men sa l sonje: “Kondisyon nan chanm kay sa a pa t toujou agreyab. Sepandan, nou te kontan gen yon kote ki te pèmèt nou soutni travay tradiksyon an. Anplis de sa, chak efò nou te fè pou n kenbe kote n ap viv la pwòp, sa te konn bay bèl temwayaj.”

Erezman kounye a, frè n ak sè n yo ann Afrik disid ka travay epi rete ansanm nan yon biwo tradiksyon ki konfòtab nan vil Douban ann Afrik disid. Kounye a, plis pase 28 000 pwoklamatè nan 584 kongregasyon nan lang zoulou kontinye ap byen pwofite Toudegad ak lòt piblikasyon nou yo ki baze sou Bib la ki disponib nan pwòp lang pa yo.

Nou kontan wè jan Jewova kontinye beni travay tout moun k ap tradui Toudegad ak lòt piblikasyon ki baze sou Bib la nan lang zoulou yon fason pou plis moun toujou ka “pran dlo lavi a gratis”. — Revelasyon 22:17.