Moun k ap ede moun ki soud yo nan peyi Afrik disid remèsye Temwen Jewova yo pou jan yo ede moun ki soud yo amelyore lavi yo lefètke yo pwodui bon kalite videyo nan lang siy sid afriken (SASL). Temwen yo resevwa remèsiman sa a apre liv Galat la ak liv Efezyen an, de liv ki nan Tradiksyon monn nouvo a — Liv ki te ekri an grèk yo, fin parèt nan SASL nan dat ki te 15 novanm 2021 an. Donk, vin gen dis liv nan Bib la ki parèt nan SASL. Yo pwograme pou gen kat lòt liv nan Bib la ki parèt nan zòn avril 2022. Tout liv sa yo disponib sou jw.org ak aplikasyon JW Library Sign Language.

Minna Steyn, yon espesyalis nan edikasyon e ki adjwen chèf nan gouvènman Kap oksidantal la, felisite Temwen yo, li di: “Mwen pran plezi gade moun k ap entèprete an lang siy yo e mwen dwe felisite ni yo menm ni òganizasyon an pou nivo ak kalite entèpretasyon lang siy lan.”

Bongani Makama, prezidan Federasyon moun ki andikape nan Eswatini, di: “Nou felisite Temwen Jewova yo paske yo pèmèt moun ki soud ak moun ki tande di yo gen aksè ak bagay moun ki pale yo genyen.” Men sa li ajoute: “[Moun ki soud yo] merite gen Bib la nan lang yo. Se poutèt sa n ap felisite Temwen Jewova yo paske yo pèmèt liv sa yo nan Bib la disponib pou moun ki soud yo nan yon lang ki ka touche kè yo. Nou pa ka tann pou gen tout 66 liv ki nan Bib la nan lang siy.”

Gen anviwon 450 000 moun ann Afrik disid ki sèvi ak SASL. Gen 283 moun ki soud oswa ki tande di ki pwoklamatè ann Afrik disid. Efò Temwen yo fè yo lakòz “tout kalite moun” rive gen yon konesans egzak sou laverite, sa gen ladan l moun ki soud ki sou tèritwa filyal Afrik disid. — 1 Timote 2:4.