Ann Afrik disid, nan dat 7 mas 2021 an, pwoklamatè ki pale kwangali, sepoulana ak setswana yo te jwenn yon bèl kado. Nan yon diskou ki te deja anrejistre, frè Mark Sanderson, yon manm Kolèj santral la te fè konnen Tradiksyon monn nouvo a — Liv ki te ekri an grèk yo parèt an kwangali e an sepoulana e Labib — Tradiksyon monn nouvo a an setswana. Pwoklamatè yo te gade pwogram espesyal la pa mwayen Entènèt, e Bib yo te disponib sou foma elektwonik.

Sa te pran dezan pou yon ekip twa moun tradui Bib la. Kounye a, plis pase 240 pwoklamatè ki pale lang sa a gen yon tradiksyon ki fasil pou li k ap ede yo amelyore etid pèsonèl yo e k ap ede yo nan travay predikasyon an.

Sa te pran ennan edmi pou sis tradiktè fè tradiksyon an. Gen 374 pwoklamatè ann Afrik disid ki pale sepoulana.

Men sa yon tradiktè di: “Nan predikasyon, souvan nou te konn sèvi ak yon tradiksyon Labib nan lang sepedi. Men, anvan nou esplike moun nan sa vèsè a di, nou te konn oblije esplike l youn oswa plizyè mo. Kounye a, grasa tradiksyon sa a, nou ka annik li vèsè a yon fwa pou moun nan epi l konprann li.”

Sa te pran katran pou yo fè revizyon sou Bib la nan lang sa a e gen sis tradiktè ki te travay sou pwojè a. Gen plis pase 5 600 pwoklamatè k ap sèvi nan tèritwa ki pale setswana.

Konsènan Tradiksyon monn nouvo a an setswana, men sa yon tradiktè di: “Tradiksyon sa a pral ede pwoklamatè yo pou yo konsantre sou fason y ap preche olye yo konsantre sou esplike mo ki difisil yo. Se pral yon bon zouti pou etid pèsonèl tou. Tablo yo, kat yo, imaj yo ak lis mo yo esplike a ap ede pwoklamatè yo imajine istwa ki nan Bib la.”

Bib sa yo ki parèt la pral ede frè ak sè nou yo ak moun y ap preche yo pou yo satisfè bezwen yo nan domèn espirityèl. Nou vrèman apresye tout kantite manje espirityèl nou genyen jounen jodi a. — Ezayi 65:13.