Nan dat 11 novanm 2022 pou rive 21 novanm 2022, yo te òganize 38^yèm festival nasyonal anyèl pou kominote imigran yo, nan Rosario, nan peyi Ajantin. Te gen plis pase yon milyon vizitè ki te vin asiste evènman sa a, kote yo mete aksan sou tradisyon ak koutim plizyè nasyon ak ras ki gen nan peyi Ajantin. Filyal peyi Ajantin nan te òganize yon kanpay predikasyon espesyal pandan festival la. Yo te atire atansyon sou sit Entènèt ofisyèl nou an, jw.org, e yo te bay moun ki te vin nan festival la piblikasyon ki baze sou Bib la. Te gen piblikasyon ki disponib nan lang siy ajantin, chinwa, anglè, gwarani, kreyòl ayisyen, pòtigè, ketchwa (Bolivi) ak espayòl. Gen plis pase 400 frè ak sè ki te patisipe nan kanpay la.

Moun ki t ap òganize festival la te pèmèt frè nou yo mete charyo piblikasyon kote anpil moun te kapab wè yo. Men sa yon ofisyèl nan vil la te di konsènan frè yo: “Nou te byen abiye e nou te chik, e nou te byen konpòte nou.” Gen yon sikològ nan vil Rosario ki te pwoche kote yon charyo e li te di: “Mwen byen abitye ak piblikasyon nou yo, e mwen renmen yo! Mwen sèvi avèk yo souvan pou pasyan m yo.”

Nan dat ki te 14 novanm 2022 a, gen yon jounal nan vil Rosario, La Capital, ki te soti yon atik ki pale sou inisyativ nou te pran pou nou preche a. Atik la te gen yon lyen ki voye moun yo sou jw.org, e li te di nan konbyen lang moun yo ap jwenn enfòmasyon sou sit la.

Nou kontan wè frè ak sè nou yo toupatou sou tè a k ap veye chak okazyon yo jwenn pou yo “bay yon temwayaj konplè sou bon nouvèl la”. — Travay 20:24.