Nan dat 16 janvye 2021 an, Labib – Tradiksyon monn nouvo a te parèt nan lang oumboundou sou fòma elektwonik. Yo te anrejistre pwogram nan e apre sa yo te pase l pou tout kongregasyon nan lang oumboundou nan peyi Angola ka gade l anmenmtan. Se frè Genésio Verdiano, yon manm komite filyal peyi Angola, ki te anonse Bib la.

Oumboundou se lang lokal moun plis pale nan peyi Angola. Yo panse gen sèt milyon moun ki pale lang sa a. Gen plis pase 6 500 pwoklamatè nan peyi Angola ki pale oumboundou.

De ekip ki gen sis tradiktè antou te travay pandan senkan pou yo fini tradiksyon sa a. Men sa yon moun nan ekip tradiksyon an di: “Nouvo tradiksyon sa a pral ede nou pi byen imajine sa k te pase yo, paske li fasil pou moun konprann. Epitou, l ap fè l pi fasil pou nou anseye Pawòl Bondye a lè n ap preche.”

Men sa yon frè nan komite filyal la di: “Nou konnen lè moun yo li Bib la nan lang yo, y ap pi byen konprann verite a. N ap kontan wè jan Jewova pral sèvi ak Pawòl li nan lang oumboundou pou touche kè plis moun.” — 2 Tesalonisyen 3:1.