Komite dwa moun nan Nasyonzini (CCPR) pran de desizyon nan mwa novanm ak mwa desanm 2021 ki soutni dwa Temwen Jewova yo genyen pou yo pale sou lafwa yo ak lòt moun. De desizyon yo gen rapò ak sè otorite nan peyi Azèbayidjan yo te arete poutèt y ap pataje mesaj ki nan Bib la ak lòt moun.

Nan dat ki te 5 novanm 2021 an, CCPR te soutni dwa sè Matanat Gurbanova ak sè Saadat Muradhasilova genyen pou yo preche. Otorite yo te arete sè yo apre yo te fin resevwa yon plent yon moun te fè an novanm 2014. Yo te kondane chak sè yo pou yo peye 1 500 mana (880 dola ameriken). CCPR fè konnen desizyon pou arete sè yo ilegal e li mande peyi Azèbayidjan pou yo fè kou yo konnen pou pa gen arestasyon konsa ankò ki fèt alavni.

Men sa Matanat ak Saadat, ki se de sè chanèl, di: “Byenke polisye yo ak jij la te vle fè nou pè, sa ki te rive a te jis fòtifye lafwa nou. Jewova te montre yon lòt fwa ankò men li pa twò kout e li konnen ki lè pou l pwoteje sèvitè l yo ak fason pou l fè sa.”

Nan dat ki te 21 desanm 2021 an, CCPR la te pran yon desizyon menm jan an, li te fè konnen polisye nan Azèbayidjan yo te vyole lalwa lefètke yo te kenbe sè Jeyran Azizova ak sè Gulnaz Israfilova nan prizon poutèt “yo t ap mennen aktivite relijye yo deyò, se pa lakay yo”. Nan desizyon CCPR la pran, li konfime sè yo pa t fè anyen ki mal lefètke yo pataje lafwa yo ak lòt moun.

Pandan sè Jeyran ak sè Gulnaz t ap vizite zanmi yo genyen nan rejyon Goranboy nan peyi Azèbayidjan an novanm 2016, yo te pataje mesaj ki nan Bib la ak lòt moun. Yon otorite nan zòn nan t al pot plent lapolis pou sè yo, e yo te arete yo. Apre plizyè jijman, gen yon jij ki akize sè yo kòm espyon e ki kondane yo pou yo peye 2 000 mana (1 176 dola ameriken). Sè yo te fè apèl, men tribinal apèl la kenbe desizyon ki te pran anvan an. Donk, sè yo te pote ka a devan CCPR.

Desizyon lalwa pran pou pwoteje dwa nou ede nou preche bon nouvèl la, travay ki pi enpòtan nou gen pou n fè a, lib e libè. Nou rejwi ak sè nou yo ki bay yon bèl egzanp kòm moun ki preche bon nouvèl la avèk kran. — Matye 10:18.