Komite dwa moun nan nasyonzini pran de desizyon enpòtan nan dat 15 desanm 2020 an konsènan ka Rahima Huseynova kont Azèbayidjan ak Saladdin Mammadov, Rashad Niftaliyev ak Sadagat Abbasova kont Azèbayidjan. Nan toule de ka yo, Komite a jije Azèbayidjan koupab paske yo vyole dwa Temwen Jewova yo e li mande pou Azèbayidjan fè chanjman nan lwa yo genyen yo yon fason pou yo pa vyole dwa Temwen yo ankò.

Ka Rahima Huseynova kont Azèbayidjan gen rapò ak sa ki te pase an desanm 2014 lè lapolis nan vil Bakou te mete sè Rahima Huseynova nan prizon paske sè Huseynova ap pale ak lòt moun sou kwayans li. Apre sa, gen yon tribinal ki te kondane l pou l peye 1 500 manats azèbayidjanè (882 dola ameriken) paske Temwen Jewova yo pa t anrejistre antanke relijyon nan vil Bakou nan moman sa a a. Lè sè Rahima Huseynova te fè apèl desizyon an, tribinal apèl la te kenbe desizyon ki te pran anvan an. Sè Huseynova te deside pote ka a devan yon tribinal entènasyonal.

Komite dwa moun nan nasyonzini an te jije peyi a koupab paske li te vyole atik 18(1) Alyans entènasyonal dwa sivil ak politik la (AEDSP). Komite a te mande pou peyi Azèbayidjan peye sè nou an dedomajman. Yon bagay ki enteresan sèke lè Komite a te fè konnen desizyon li pran, li te di peyi Azèbayidjan “dwe fè tout sa yo konnen pou anpeche yo vyole dwa moun menm jan an alavni. Sa vle di peyi Azèbayidjan ka bezwen chanje lwa li yo, ak/oswa fason yo aji yon fason pou yo pwoteje epi respekte dwa moun, jan atik 18 nan [AEDSP] a mande sa”.

Ka Saladdin Mammadov, Rashad Niftaliyev ak Sadagat Abbasova kont Azèbayidjan an li menm gen rapò ak yon gwoup frè ak sè nan Ganja ki te rasanble ansanm pou yo etidye Bib la lakay frè Saladdin Mammadov. Nan mwa oktòb 2014, lapolis t al nan kay kote ti reyinyon an t ap fèt la, yo fouye kay la e yo sezi Bib ak lòt bagay ankò. Yo te mennen frè Mammadov, frè Rashad Niftaliyev ak sè Sadagat Abbasova nan pòs polis la, e yo te kenbe yo pandan plis pase sis èdtan. De jou apre, yo te mande yo pou yo parèt devan tribinal ki nan vil Ganja a nan distri Nizami. Tribinal la te fè konnen reyinyon an te ilegal paske moun ki te nan reyinyon an pa t nan yon relijyon ki anrejistre nan vil Ganja. Tribinal la te kondane frè yo pou yo chak peye 2 000 manats azèbayidjanè (1 176 dola ameriken). Frè yo te fè apèl nan tribinal apèl vil Ganja a. Malerezman, tribinal apèl la te kenbe desizyon premye tribinal te pran an. Donk, frè yo te pote ka a devan Komite dwa moun nan nasyonzini an.

Komite a te rann li kont peyi Azèbayidjan vyole anpil atik nan AEDSP a e li dwe peye twa Temwen yo dedomajman. Yon bagay ki enteresan sèke lè Komite a te fè konnen desizyon li te pran, li te di “tribinal distri a pa t bay okenn agiman sou rezon ki fè li te nesesè pou frè yo te anrejistre nan gouvènman an anvan yo reyini nan yon kay pou yo pratike relijyon yo”. Deklarasyon sa a montre aklè frè nou yo nan peyi Azèbayidjan gen dwa pou yo reyini ansanm pou yo adore san yo pa bezwen anrejistre legalman.

Menm jan ak ka Rahima Huseynova a, Komite a mande peyi Azèbayidyan pou l pase men nan “lwa li yo, ak/oswa fason yo aji” pou yo ka asire yo yo respekte dwa moun, jan AEDSP a mande sa.

Nou vrèman kontan wè sitiyasyon an amelyore nan peyi Azèbayidjan, e nan dènye ane sa yo, otorite yo pa vyole dwa frè nou yo genyen pou yo adore Bondye. Nou swete de desizyon sa yo pral bay plis baz legal pou defann bon nouvèl la nan peyi Azèbayidjan. — Filipyen 1:7.