Nan peyi Brezil, gen anviwon 1 500 vil ki pa gen kongregasyon. Gen kèk nan vil sa yo ki nan zòn izole e anpil moun ladan yo pa janm gen kontak ak Temwen Jewova yo. Pou rezon sa a, fiIyal peyi Brezil te òganize yon kanpay espesyal pou preche nan vil sa yo soti septanm 2020 rive desanm 2020. Akoz restriksyon COVID-19 la, kanpay la te fèt pa mwayen lèt. Te gen pwoklamatè nan 3 000 kongregasyon ki te patisipe.

Pwoklamatè yo te fè rechèch sou Entènèt sou vil yo asiyen yo a, e yo adapte lèt yo ekri yo ak bezwen moun ki nan zòn nan. Pa egzanp, gen yon pyonye ki te ekri lèt pou moun k ap viv nan yon vil nan eta Tokanten. Li te dekouvri sa pa gen lontan depi dife te ravaje zòn nan. Nan lèt li te ekri a, li te pale de pawòl ki nan Revelasyon 21:5 yo, e li te esplike fason Jewova pral “fè tout bagay vin tounèf” epi rezoud pwoblèm anviwònman an alavni. Kèk jou annapre, gen yon dam ki te voye yon mesaj odyo pou pyonye a pou di jan li kontan konnen Bondye “ka amelyore lavi nou”. Dam nan te fè konnen li vle konn plis.

Gen yon sè ki te preche yon moun e moun nan te voye yon mesaj tèks pou sè a, sa ki montre gwo efè kanpay la genyen sou moun yo. Men sa moun nan te ekri: “Mwen pa gen mo pou m esplike jan Bondye te sèvi avè w pou l ede m. [...] Mèsi! Ou fè m kwè ankò Bondye renmen m, e li pran swen ni mwen menm ni fanmi m! Mwen santi Bondye renmen m. Byenke mwen pa konnen w, ou se repons yon priyè. Se ak tout kè m m ap di w mèsi!”

Men sa yon ansyen k ap sèvi nan kongregasyon Itamarati, nan Petropolis nan Rio de Janeiro, di konsènan jan frè ak sè ki te patisipe nan kanpay la santi yo: “Nou santi nou tankou pyonye espesyal yo voye nan yon tèritwa izole. Se yon okazyon anpil frè nòmalman pap genyen akoz sikonstans yo ak responsablite nan fanmi yo.”

Se sèten, Jewova te beni kanpay sa a. Nou gen privilèj patisipe nan travay k ap fèt pou preche “bon nouvèl” la “tout kote anba syèl la”. — Kolosyen 1:23.