Nan jou ki te dimanch 5 mas 2022 a, frè Alan Costa, yon manm komite filyal peyi Ekwatè, te fè konnen Tradiksyon monn nouvo a — Liv ki te ekri an grèk yo parèt nan lang kechwa chimborazo ak nan lang kechwa imbabouwa, ki se de prensipal lang ki soti nan lang kechwa yo pale nan peyi Ekwatè. Tradiksyon Labib sa yo te parèt ni nan fòma elektwonik ni nan fòma enprime nan yon pwogram yo te anrejistre e yo te pase pou pwoklamatè yo.

Pifò moun ki pale lang kechwa ap viv nan mòn Lèzann, ki nan anviwon 2 700 mèt a 3 700 mèt parapò ak nivo lanmè a. Moun k ap viv nan zòn sa yo gen bon relasyon youn ak lòt, e yo konnen yo kòm moun ki renmen bay, ki renmen travay e ki renmen akeyi moun. Anpil ladan yo kwè nan yon Kreyatè e yo gen yon gwo respè pou Bib la.

Nan ane 1990 yo, Temwen Jewova yo te tradui piblikasyon nan lang yo rele kechwa ini, yon melanj plizyè lang yo pale toupatou nan peyi Ekwatè. Sepandan, se kèk moun nan tèritwa yo pale lang kechwa a ki te montre yo enterese nan mesaj Wayòm nan. Li klè frè yo te bezwen piblikasyon ki tradui nan chak lang yo pou moun yo te ka aksepte mesaj Wayòm nan.

Ekip tradiksyon nan lang kechwa a te jwenn èd nan men pwoklamatè ki t ap viv plizyè kote nan peyi a, ki te reli tradiksyon yo te fè yo. Men sa yon tradiktè di anrapò ak jan èd yo te bay la te ede yo rive fè fas ak difikilte ekip tradiksyon an te jwenn pou yo tradui Bib la nan lang kechwa chimborazo pou yon gwoup moun ki pale lang nan yon lòt jan: “Grasa èd yo ban nou, nou rive fè yon tradiksyon tout moun ka konprann.” Men sa yon tradiktè nan ekip kechwa imbabouwa a di: “Jewova te kontinye gide nou, e mwen ka wè aklè li vle chak moun konnen Pawòl li epi konprann li.”

De nouvo tradiksyon sa yo pral yon benediksyon pou frè ak sè ki pale lang kechwa k ap sèvi Jewova, Bondye nou an, li menm ki se yon “Sovè pou tout kalite moun”. — 1 Timote 4:10.