Nan dat ki te 24 out 2021 an, Temwen Jewova yo nan peyi Ekwatè te genyen yon ka enpòtan devan tribinal. Tribinal konstitisyonèl la te fè yon jijman ki fè konnen yo te vyole dwa kominote endijèn nan nan San Juan de Ilumán, ki nan pwovens Imbaboura, genyen pou yo adore lib e libè. Desizyon tribinal la pran an pwoteje dwa moun k ap viv toupatou nan peyi Ekwatè genyen pou yo adore lib e libè, sitou moun k ap viv nan kominote endijèn yo, e se yon desizyon enpòtan lòt peyi ka suiv.

An 2014, otorite yo ki nan kominote endijèn nan te antre ak fòs sou yon chantye Temwen Jewova yo pou yo kanpe konstriksyon yon Sal Wayòm ki t ap fèt. Epitou, yo te entèdi frè ak sè yo reyini ansanm pou yo adore, e yo te entèdi yo preche kay an kay. Frè yo te mennen dosye a devan tribinal. Men, de jij nan tribinal ki nan zòn nan te fè yon jijman kont Temwen yo, kote yo te fè konprann otorite yo pa t vyole dwa konstitisyon an bay Temwen yo.

Apre frè yo te fin fè tout sa yo kapab pou regle pwoblèm nan devan tribinal, yo te pote ka a devan Tribinal konstitisyonèl la, pi gwo tribinal nan peyi a. Tribinal konstitisyonèl la te fè konnen lòt tribinal yo te vyole dwa lalwa bay Temwen yo pou yo adore lib e libè. Li te bay otorite yo ki nan kominote endijèn nan ak jij yo lòd pou yo suiv yon kou sou tolere moun ki nan lòt relijyon e ki gen lòt kilti. Mete sou sa, yo te mande otorite yo ki nan kominote a pou yo ede “divès gwoup relijye ak kilti viv ansanm nan lapè, e pou yo sitou pwoteje” Temwen Jewova yo.

Philip Brumley, ki se avoka prensipal Temwen Jewova yo, di: “Nou rekonèt dwa endijèn yo genyen yo pwoteje kilti endijèn yo, men li pa t ap bon pou yo sèvi ak dwa sa yo pou vyole dwa fondamantal nenpòt sitwayen genyen.”

Temwen Jewova nan San Juan de Ilumán gen rekonesans pou desizyon tribinal la pran an.

Nou kontan wè “men Jewova” lè frè ak sè nou yo jwenn byenfè nan viktwa sa yo yo ranpòte ki pwoteje libète yo genyen pou yo adore. — Pwovèb 21:1.