Akoz pandemi COVID-19 la, 11 Biwo tradiksyon ki pa nan Betèl ki ann End yo, kote yo tradui piblikasyon nou yo nan 36 lang, vin ap fè fas ak yon seri nouvo pwoblèm. Grasa èd Jewova, ekip tradiksyon yo rive jwenn solisyon pou pwoblèm sa yo.

Pou tradiktè yo rive tradui piblikasyon nou yo, li enpòtan pou yo travay ansanm, pou yo travay ann ekip. Men kòm viris COVID-19 la te kontinye ap gaye, End te vin nan konfinman, konsa li te vin enposib pou tradiktè yo rankontre pou yo travay ann ekip. Anplis de sa, tout moun k ap travay nan anrejistreman odyo ak videyo yo tou pa t kapab rankontre pou yo fè anrejistreman yo.

Nan biwo tradiksyon sa yo, tradiktè yo te kòmanse itilize videyo konferans pou yo travay ansanm olye yo te rankontre youn ak lòt, epi yo te fè anrejistreman yo adistans. Metòd travay sa a te pèmèt tradiktè yo vin gen plis resous disponib, piske kounye a yo te kapab jwenn èd nan men frè ak sè k ap viv nan lòt peyi tankou Bengladèch ak Etazini.

Frè yo te jwenn lòt fason pou yo pwodui videyo nan lang siy toutpandan yo kontinye kenbe distans yo youn ak lòt. Kèk tradiktè te fè chanm yo tounen stidyo, epi, olye yo sèvi ak ekipman yo abitye sèvi yo, yo itilize bagay yo genyen ki disponib. Pa egzanp, yo itilize kamera telefòn yo nan plas kamera sofistike yo te konn itilize yo e yo jis mete yo chita sou yon seri bwat katon.

Anplis de tout bagay sa yo, tradiktè yo k ap travay nan Biwo tradiksyon ki pa nan Betèl yo konte sou Jewova pou l ede yo gen yon etadespri pozitif e pou yo kapab kontinye fè travay la jan yo te konn fè l la. Men sa kèk nan yo di:

Frè Jose Francis k ap viv Kolkata di: “Lè n ap fè fas ak yon sitiyasyon ki difisil, yon moun kapab ret konsantre sou pwoblèm nan sèlman, men Jewova wè solisyon an.”

Sè Bindu Rani Chandan k ap viv Bangalò di: “Malgre obstak yo, mwen gen anpil kè kontan lefètke m konnen Jewova ap sèvi avè m nan moman difisil sa yo.”

Sè Rubina Patel k ap viv Vadodara pataje santiman l lè l di: “Pa gen anyen ki ka bloke Jewova ak òganizasyon l lan, pa menm kowonaviris la.”

Nou fyè de frè ak sè n yo k ap fè travay tradiksyon an ak anpil dilijans. Nou sèten se grasa fòs lespri sen Jewova ki fè yo reyisi fè travay la e lespri sen Jewova ap pèmèt pwofesi Jezi te bay la reyalize, lè Jezi te di: “Yo pral preche bon nouvèl sa a konsènan Wayòm nan sou tout tè a, kòm yon temwayaj pou tout nasyon.” — Matye 24:14.