Jan nou te fè konn sa nan dènye nouvèl sou jw.org la, jou ki te dimanch 29 oktòb 2023 a, gen plizyè bonm ki te eksploze nan yon kongrè rejyonal ki t ap fèt nan Kerala, ann End. Malerezman, anplis de de sè ki te mouri jou sa a, gen yon tifi 12 an ki te blese ki mouri tou. Gen 55 frè ak sè ki blese, pami yo gen kèk ki boule grav.

Pou kounye a, gen twa sè ak de frè ki toujou lopital, nan yon eta ki grav. Otorite yo fè konnen gen omwen twa bonm ki te eksploze pandan priyè pou kòmanse pwogram nan, ozanviwon 9:40 a.m. Moun yo sispèk ki fè zak kriminèl sa a nan men lapolis pou kounye a e yo kontinye ap mennen ankèt.

N ap di moun nan sèvis ijans yo mèsi anpil paske yo te vini byen vit nan lokal la pou yo pote èd yo e n ap di staf lopital la mèsi anpil tou pou swen y ap bay moun ki blese yo.

Lanmou ak sipò kretyen yo te demontre youn pou lòt te touche kè moun ki te nan asistans lan tou. Men sa yon sè ki te nan asistans lan lè bonm yo eksploze a di: “Menm kote a mwen te kòmanse priye Jewova. Frè nan sèvis akèy yo ansanm ak kèk lòt frè te byen pran swen nou. Yo te aji vit pou mete nou an sekirite. Sa te montre nou ki jan Jewova renmen nou e l gen sousi pou nou chak.”

Reprezantan biwo filyal End lan, siveyan sikonskripsyon ak ansyen nan kongregasyon nan zòn nan kontinye bay frè ak sè ki afekte yo bonjan ankourajman ki soti nan Bib la ak lòt èd yo bezwen. Men sa yon ansyen ki soti nan biwo filyal la ki vin Kerala pou konsole frè ak sè ki viktim nan atak la fè konnen: “Malgre frè ak sè ki viktim yo sou chòk, yo nan lapenn e yo twomatize, sa ankouraje m lè m wè bèl etadespri yo genyen. Mwen te pale ak anpil ladan yo e lè mwen wè jan yo konte sou Jewova, sa fè lafwa m vin pi djanm.”

Nou menm frè ak sè toupatou sou tè a, n ap priye pou fanmi moun ki mouri yo e pou tout moun ki viktim nan gwo trajedi sa a ki fèt ann End lan. Nou jwenn konsolasyon ak lapè lè n sonje Bib la fè nou pwomès talè konsa pap gen vyolans, soufrans ak lanmò ankò. Nou toujou gen menm detèminasyon pou n kontinye mete tout konfyans nou nan Jewova. — Sòm 56:3.