Nan dat ki te 28 novanm 2020 an, Labib — Tradiksyon monn nouvo a te parèt sou fòma enprime ak sou fòma elektwonik nan kat lang nan peyi Endonezi: batak karo, batak toba, javanè ak niyas. Frè Geoffrey Jackson, yon manm Kolèj santral la, te fè anons lan nan yon pwogram espesyal yo te anrejistre alavans. Yo te pase pwogram nan pou tout kongregasyon ki nan pakèt zile peyi Endonezi yo. Anviwon 41 265 moun te gade pwogram nan. Pandan pwogram nan, frè Jackson te fè konnen tou Tradiksyon monn nouvo a — Liv ki te ekri an grèk yo pral parèt talè konsa sou fòma elektwonik nan lang soundanè.

Pou tradiksyon sa yo vin disponib, tradiktè yo te travay di anpil sou pwojè sa yo pandan plis pase twazan edmi. Gen plis pase 100 milyon moun ki pale omwen youn nan kat lang tradiksyon sa yo fèk parèt la. Mete sou sa, gen plis pase 2 600 pwoklamatè ki sèvi ak lang sa yo nan travay predikasyon an ak nan reyinyon yo.

Jodi a, byen souvan, moun yo pa abitye ak pwononsyasyon ak langaj yo itilize nan ansyen tradiksyon Labib yo, paske yo pase mòd. Men sa yon tradiktè di: “Lefètke nou gen Labib — Tradiksyon monn nouvo a, ki se yon tradiksyon ki pou epòk nou an, sa ban m plis konviksyon toujou Jewova Dye vle tout moun tande Pawòl li a nan yon lang ki fasil pou moun konprann e ki touche kè moun.”

Men sa Daniel Purnomo, yon manm Komite filyal peyi Endonezi, di: “N ap viv nan tan ki difisil, sitou akoz pandemi COVID-19 la. Se pa ti apresye frè ak sè ki pale lang sa yo apresye kado sa a Jewova ba yo nan bon moman.”

Nou gen anpil rekonesans pou Jewova paske li fè Pawòl li a, ki se yon bèl kado, disponib pou plis moun toujou. Nou swete pral gen plis moun toujou, ki pale lang sa yo, ki pral pwofite ansèyman ki soti nan Bib la. — Jak 1:17.