28 FEVRIYE 2023
NOUVÈL ENTÈNASYONAL
Asanble sikonskripsyon yo ak lekòl teyokratik yo rekòmanse an pèsòn
Apre prèske twazan, asanble sikonskripsyon yo rekòmanse fèt an pèsòn toupatou sou tè a an janvye 2023. Nan menm peryòd la, lekòl teyokratik yo te rekòmanse fèt an pèsòn nan plizyè peyi. Sa klè Jewova beni evènman espesyal sa yo.
Nan Villahermosa, nan Eta Tabasko, nan peyi Meksik, gen anviwon 200 pwoklamatè ki te patisipe nan netwaye Sal asanble a anvan asanble sikonskripsyon an. Gen kèk nan pwoklamatè sa yo ki te fè anviwon 6 èdtan ap vwayaje pou yo te ka la. Men sa yon sè esplike: “Sa fè lontan nou pa t wè anpil frè ak sè reyini ansanm. Nou pa t ka rate posiblite pou n la tou.”
Nan yon asanble sikonskripsyon nan Crownsville, Merilann, Ozetazini, men sa yon sè di: “M kontan anpil. Depi lè m vini an m ap kriye tèlman m kontan. M gentan itilize tout napkin m te genyen yo e pwogram nan poko menm kòmanse. Pa gen anyen ki te ka fè m rate sa.”
Frè ak sè ki rive nan yon asanble sikonskripsyon nan Kagwas, Pòtoriko.
Elèv nan tèritwa anpil filyal te kontan asiste Lekòl pou evanjelizatè Wayòm nan an pèsòn ak Lekòl pou siveyan sikonskripsyon yo ak madanm yo. Men sa frè Giovanny Cabezas, yon enstrikstè nan lokal pou Lekòl ki nan Palm Coast, Florid, Ozetazini, di: “Mwen te kontan anpil lè m te aprann Lekòl teyokratik yo t ap rekòmanse an pèsòn. Gen yon bèl anbyans ant enstriktè yo, elèv yo ak volontè yo e objektif yo tout se pou yo fè volonte Jewova.”
Sè Satoko Nakata te asiste Lekòl pou siveyan sikonskripsyon yo ak madanm yo ansanm ak mari l an janvye 2023. Men sa l di: “Se yon bèl bagay dèske reyinyon yo ak lekòl pyonye yo te kontinye fèt sou Zoom pandan pandemi an. Men, li pa t fasil pou nou gen bèl konvèsasyon e pou n tande frè ak sè yo k ap ri oswa k ap chante. Lefètke nou te ka asiste lekòl sa a an pèsòn se yon bèl kado Jewova fè nou. Nou menm elèv yo, nou pale e nou ri ansanm, pafwa nou kriye ansanm e nou chante ansanm ak kè kontan. Mwen gen Jewova ak Kolèj santral la anpil rekonesans pou sa.”
Elèv nan peyi Kenya k ap asiste Lekòl pou evanjelizatè Wayòm nan.
Pa gen dout, sa fè Jewova kontan anpil lè l wè pèp li a reyini ansanm pou yo adore l e pou yo jwenn fòmasyon nan men l. Nou di menm pawòl ak wa David: “ Lè sa a, m a remèsye w nan gwo kongregasyon an, m a louwe w nan mitan gwo foul moun yo.” — Sòm 35:18.