Nan dat 1^ye septanm 2024 la, frè Massimiliano Bricconi, yon manm komite filyal Itali a te prezante Tradiksyon monn nouvo a nan lang siy italyen. Yo te fè anons lan pou 854 moun ki te nan asistans lan nan yon Sal asanble nan vil Wòm, ann Itali pou kongrè rejyonal 2024 “Anonse Bon Nouvèl La!”. Bib la te disponib pou telechaje tousuit sou jw.org e sou aplikasyon lang siy JW Library a.

Se premye tradiksyon Labib okonplè ki fèt nan lang siy italyen. Temwen Jewova yo te kòmanse pibliye piblikasyon ki baze sou Labib nan lang siy italyen nan ane 1998. Jodi a, gen 845 frè ak sè k ap sèvi nan 15 kongregasyon lang siy italyen, 12 gwoup ak 10 anvan gwoup nan peyi Itali.

Nan dat 6 septanm 2024 la, frè Frederick Nyende, yon manm komite filyal Ouganda a te prezante liv biblik Matye, Mak, Lik ak Jan nan lang woutoro. Yo te fè anons lan nan kongrè rejyonal 2024 “Anonse bon nouvèl la!” ki te fèt nan vil Hoima, nan peyi Ouganda. Tout 928 moun ki te nan asistans lan te resevwa Labib — Bon nouvèl la selon Matye a. Mete sou sa, toule kat liv biblik yo te disponib tousuit pou moun telechaje sou jw.org e sou aplikasyon JW Library a.

Yo estime gen 2,2 milyon moun nan peyi Ouganda ki pale lang woutowo oubyen lang wounyowo, yon lang ki sanble lang woutowo. Gen anpil lòt tradiksyon Labib ki egziste deja nan lang sa yo ki retire Jewova, non Bondye. Nou gen 374 frè ak sè nan de kongregasyon woutowo e nan kat kongregasyon wounyowo nan peyi Ouganda. Yo vrèman kontan gen kat evanjil yo ki egzak e ki klè pou yo itilize nan travay predikasyon an e nan reyinyon yo.

Nan dat 8 septanm 2024 la, liv Matye a te parèt ni nan karaktè wigou (arab), ni nan karaktè wigou (sirilik). Yo te fè yon anons lan nan yon reyinyon espesyal ki te fèt nan biwo filyal ki nan vil Almati, nan peyi Kazakstan. Antou te gen 483 moun nan asistans lan. Liv Matye a te disponib tousuit pou moun telechaje sou jw.org e sou aplikasyon JW Library ni nan wigou (arab), ni nan wigou (sirilik).

Anpil tradiksyon Labib ni nan karaktè wigou (arab), ni nan karaktè wigou (sirilik) itilize yon langaj ansyen, sa ki fè l difisil pou anpil moun konprann sa yo li a. Gen anviwon 11 milyon moun ki pale wigou jodi a e pifò ladan yo ap viv ann Azi. Sepandan, gen moun ki pale wigou ann Afrik, ann Ewòp e ann Amerik dinò.

Nan dat 13 septanm 2024 la, frè Moses Oundo, yon manm komite filyal Ouganda a, te prezante liv biblik Matye, Mak, Lik ak Jan nan lang loukonzo devan 925 moun ki te prezan nan kongrè rejyonal “Anonse bon nouvèl la!” ki te fèt nan peyi Ouganda, nan vil Bwera. Tout moun ki te nan asistans lan te resevwa Labib — Bon nouvèl la selon Matye a. Anplis, toule kat evanjil yo te disponib tousuit pou moun telechaje sou jw.org e sou aplikasyon JW Library a.

Nan peyi Ouganda, gen omwen yon milyon moun ki pale loukonzo. Temwen Jewova yo te kòmanse tradui piblikasyon ki baze sou Labib nan lang loukonzo nan ane 2001. Jodi a, gen 324 frè ak sè k ap sèvi nan sis kongregasyon ki pale lang loukonzo.

Nan dat 15 septanm 2024 la, frè Jethro Barclay, yon manm komite filyal Liberya a, te prezante liv biblik Matye ak Mak nan lang anglè liberyen. Li te fè anons lan pandan yon reyinyon espesyal ki te fèt nan yon Sal asanble nan vil Johnsonvil, nan peyi Liberya. Antou, gen 1 176 moun ki te asiste reyinyon espesyal la an pèsòn. Anplis, yo te resevwa apwobasyon pou tout kongregasyon nan peyi Liberya ki pale lang anglè liberyen te ka konekte pou gade pwogram nan pa mwayen videyo konferans. Toule de liv biblik yo te disponib tousuit pou moun telechaje sou fòma elektwonik ak fòma odyo sou jw.org e sou aplikasyon JW Library a. Anvan lontan, Labib — Bon nouvèl la selon Matye ap disponib nan fòma enprime.

Gen kèk liv biblik nan fòma odyo ki disponib nan lang anglè liberyen. Sepandan, se premye fwa yo tradui yon pati nan Pawòl Bondye a nan lang anglè liberyen sou fòm ekri. Menmsi anglè se lang ofisyèl Liberya, yo estime gen 1,6 milyon moun ki pale anglè liberyen, pami yo gen 7 034 frè ak sè ki fè pati 120 kongregasyon.

Nan dat 20 septanm 2024 la, frè Lázaro González, yon manm komite filyal Amerik santral la, te prezante liv biblik Matye, Mak, Lik ak Jan nan lang nawouat (Guerrero). Li te fè anons lan premye jou kongrè rejyonal 2024 “Anonse bon nouvèl la!” ki te fèt nan Sal asanble Chilpancingo, nan peyi Meksik, nan eta Guerrero. Antou, te gen 769 moun nan asistans lan. Anplis, te gen 742 moun ki te suiv pwogram kongrè rejyonal la pa mwayen videyo konferans nan vil Tlapa de Comonfort, nan peyi Meksik. Nan toule de kote sa yo, tout moun ki te la yo te resevwa Labib — Bon nouvèl selon Matye a pa yo, toule kat evanjil yo te disponib tousuit pou moun telechaje sou jw.org e sou aplikasyon JW Library a.

Gen omwen 250 000 moun nan Meksik ki pale lang nawouat (Guerrero). Premye kongregasyon ki pale lang nawouat (Guerrero) te fòme nan ane 1987. Jodi a, gen 1 216 frè ak sè k ap sèvi nan 37 kongregasyon ki pale lang nawouat (Guerrero) ak 2 gwoup nan peyi a.