Nan mwa janvye 2021 an, Kolèj santral la te anonse yon nouvo liv ak bwochi ki rele Ou kapab viv ak kè kontan pou toutan! Piblikasyon sa yo ki itilize metòd ansèyman kote moun nan ka patisipe ede nou pi byen kondui etid Labib yo.

Yo ajoute nouvo fonksyon nan aplikasyon JW Library a pou ka fè liv ak bwochi ki nan vèsyon elektwonik lan pi atiran e pi enteresan ni pou anseyan an ni pou etidyan an. Pran yon ti tan pou w ka alèz ak nouvo fonksyon sa yo.

• Èske w vle atire atansyon etidyan an sou yon pwen byen presi nan yon leson? Tape paragraf la pou w ka ouvri opsyon ki disponib yo. Chwazi opsyon Pataje a pou w ka pataje yon lyen pou paragraf sa a.

• Èske w vle koute anrejistreman odyo yon paragraf ak etidyan an? Tape paragraf la pou w ka ouvri opsyon ki disponib yo. Chwazi opsyon Jwe pou w jwe odyo a apati paragraf sa a.

• Petèt etidyan w lan ap sèvi ak vèsyon enprime a pandan ou menm w ap sèvi ak vèsyon elektwonik lan. Èske w ta renmen wè ki jan paj yo parèt nan vèsyon enprime a? Nan Plis opsyon (nan twa ti pwen ki parèt anlè adwat nan kwen ekran an), chwazi opsyon k ap pèmèt ou wè Vèsyon enprime a. Pandan w la, ou ka chwazi Vèsyon elektwonik si w vle retounen wè l jan l te ye anvan an.

• Èske w ta renmen ede etidyan yo note kèk bagay nan vèsyon enprime a k ap ede yo nan pwogrè y ap fè? Ankouraje yo sèvi ak kare yo bay pou mete dat yo fini leson an oswa pou yo ekri yon objektif presi yo genyen. Epitou, yo ka sèvi ak kare ki nan tablo “Sonje kote w rive nan lekti Labib ou” pou yo tcheke kote yo rive.