Temwen Jewova toupatou sou tè a te pase mwa novanm nan ap distribye Toudegad N^o 2 2020 ki pou piblik la nan biznis yo, bay moun nan fanmi yo ak moun ki renmen li peryodik nou yo. Yon bagay ki te espesyal nan kanpay sa a sèke yo te distribye peryodik la bay anpil otorite nan gouvènman yo. Biwo filyal yo deja resevwa yon pakèt mesaj ki montre moun yo byen reyaji.

Nan peyi Syera Leyòn, Rex Bhonapha, ki adjwen minis pou tè yo, amenajman tèritwa ak anviwònman an, te ekri yon lèt pou l di frè yo mèsi paske yo te voye peryodik la pou li. Li di: “Mwen dwe admèt peryodik nou an te vrèman ankourajan e li te gen bonjan enfòmasyon. Kounye a, mwen li l chak jou.”

Nan Samowa, premye minis la te voye yon lèt pou l di frè yo mèsi e li te di yo jan li apresye priyè Nòtrepè a. Mete sou sa, chèf deta a, Tuimalealiifano Vaaletoa Sualauvi II, te fè konnen li apresye travay n ap fè pou n anseye moun yo Labib. Li di sa “ede moun yo, e sa yo aprann nan Bib la ede yo chanje lavi yo”. Epitou, li te felisite frè yo paske yo pa fè reyinyon nan Sal Wayòm yo ankò e yo pa al preche kay an kay ankò akoz pandemi COVID-19 la.

Osvaldo Cartagena García, sekretè yon meri nan peyi Chili, di: “Mwen espere bèl kanpay n ap fè a pral ede nou anseye tout moun ki gen otorite nan peyi a, e l ap pouse yo fè bèl aksyon pou tout kominote a, espesyalman kounye a pou jan sitiyasyon an ye nan peyi a e toupatou sou tè a.”

Men sa yon manm palman peyi Almay la (Deutscher Bundestag) ekri filyal Ewòp santral la: “Mwen konnen relijyon nou an. Mwen gen anpil respè pou moun nan relijyon nou an paske m konnen jan nou te met kouraj sou nou pou nou di lòt moun nou se Temwen Jewova. [...] Epitou, mwen konnen jan nou te soufri akoz gwo pèsekisyon nou te jwenn sou rejim Nazi a.”

Menm jan an tou, yon ministè federal peyi Almay te di Temwen yo mèsi paske yo konsole moun pandan pandemi COVID-19 la. Men sa l esplike: “Lè nou konsole moun yo nan peyi a, nou ede yo rete soude.”

Nan peyi Kolonbi, de manm gouvènman an te ekri filyal la pou di yo mèsi pou peryodik la. Yo di y ap bay lòt moun peryodik la. Men sa yon ofisyèl nan ministè anviwònman, lojman ak devlopman dirab te ekri tou: “Mèsi anpil paske nou te voye Toudegad la pou mwen. Li gen yon mesaj ki ka sove lavi!”

Men sa Frank Okyere, anbasadè Gana nan peyi Japon, di: “Mwen twouve peryodik la gen bonjan enfòmasyon paske li pale sou solisyon pou anpil pwoblèm lèzòm genyen.”

Menm jan an tou, men sa yon anbasadè peyi Azèbayidjan di: “Mèsi anpil paske nou te voye Toudegad espesyal la pou anbasad la. Mwen te li peryodik la avèk anpil atansyon.”

Nou dakò ak frè Amaro Teixeira, siveyan Biwo enfòmasyon pou piblik la nan filyal peyi Mozanbik, ki di: “Kanpay sa a deja pote plis rezilta pase sa nou te panse. Nou te rive pataje mesaj Wayòm nan ak moun nou pa abitye preche an jeneral.”

Pa gen dout nan sa, n ap jwenn plis mesaj remèsiman toujou nan men ofisyèl nan gouvènman yo ak lòt moun, toutpandan mesaj nan Bib la ap kontinye touche “tout moun ki nan gwo pozisyon”. — 1 Timote 2:2.