Kongrè 2020 an ki te gen tèm “Se pou nou toujou rejwi”! se te youn nan kongrè ki espesyal nan istwa Temwen Jewova yo. Yo te tradui pwogram nan nan plis pase 500 lang, e moun te ka gade l pandan yo lakay yo. Tradiktè yo te fè fas ak anpil difikilte, tankou yo pa gen ase ekipman e yo pa gen ase tan devan yo pou yo fè travay la.

Men sa yon sè nan ekip tradiksyon lang kikiyou nan peyi Kenya di: “Kòm filyal la te fèmen, se sèlman kèk moun nou te ka jwenn pou n anrejistre vwa yo. Pou nou te rive fè fas ak difikilte sa a, nou te anrejistre frè ak sè yo pandan yo lakay yo. Nou te kontan wè jan lespri sen Jewova ap aji.”

Ekip tradiksyon nan lang siy koreyen ak ekip tradiksyon nan lang koreyen te fè fas ak menm pwoblèm nan. Moun ki pa nan Betèl e k ap soutni ekip tradiksyon an pa t ka vini nan Betèl pou yo anrejistre vwa yo.

Pou yo te fè fas ak pwoblèm sa a, gen frè ki te fè stidyo anrejistreman lakay yo. Frè nan zòn nan te bay pifò ekipman yo te bezwen pou fè anrejistreman an. Mete sou sa, kòm yo te anile tout asanble yo, filyal la te ka sèvi ak kèk nan kamera ki nan Sal asanble yo pou yo anrejistre pwogram nan nan lang siy.

Nan peyi Venezyela, li te difisil pou tradiktè yo travay akoz pa gen bon Entènèt. Gen lòt ki pa t gen ase ekipman. Men malgre difikilte sa yo, tradiktè sa yo te sèvi ak kèlkeswa sa yo jwenn nan pou yo fè travay yo. Pa egzanp, tradiktè nan yon zòn te sèvi ak matla pou diminye bri pandan y ap anrejistre.

Nan Djouba, nan peyi Soudan disid, gen yon ekip ki t ap tradui nan lang zande. Men sa youn nan tradiktè yo di: “Lè m te aprann nou pral anrejistre tout kongrè a, mwen te di tèt mwen: ‘Sa pa posib! Nou pa ka anrejistre tout kongrè a, ki gen plis pase 90 pwodiksyon odyo ak videyo, nan sèlman de mwa.’ Kounye a nou fini travay la, mwen vrèman gen konviksyon pa gen anyen ki ka anpeche Jewova akonpli volonte l. Fason li fè bagay yo fè n rete bouch ouvè!” — Matye 19:26.

Pwogram kongrè 2020 an ki te gen tèm “Se pou nou toujou rejwi”! se vrèman yon kado ki soti nan Jewova, Sila a “ki vle pou tout kalite moun sove e ki vle yo gen yon konesans egak sou laverite”. — 1 Timote 2:4.