Depi 2019, aparèy elektwonik ki gen Amazon Alexa oswa Google Assistant bay posiblite pou jwe yon seri bagay sou jw.org. Kounye a, gen plis opsyon ki pèmèt itilizatè yo tande plis bagay anrapò ak zouti nou itilize nan reyinyon nou yo ak nan travay predikasyon an. Malerezman, apati jen 2023 li pap posib pou moun itilize Google Assistant konsa ankò. Annatandan dat sa a, nou ka kontinye pwofite opsyon sa a. Men, opsyon sa yo ki sou Amazon Alexa tou ap kontinye disponib yo menm.

Moun k ap itilize Amazon Alexa oswa Google Assistant ka mande aparèy yo pou yo li pwogram reyinyon lasemèn nan dirèkteman nan Pwogram reyinyon lavi nou ak travay nou fè, e yo ka mande yo li leson ki nan bwochi Konsantre w sou lekti w ap fè ak ansèyman w ap bay la. Lè yon itilizatè ap prepare pou yon etid Labib, li ka mande asistan vityèl yo pou yo jwe yon leson nan liv Ou kapab viv ak kè kontan pou toutan! an.

Anplis de sa, itilizatè yo ka tande chante ki pou reyinyon yo ki nan liv ‘Ann chante ak kè kontan’ pou Jewova, e yo ka tande mizik kote gen moun k ap chante ak mizik kote se enstriman yo ou tande sèlman. Asistan vityèl yo ka jwe dènye enfòmasyon Kolèj santral la bay yo tou.

Pou w ka konnen ki fason pou w gen aksè ak opsyon pou chak asistan vityèl yo, gade enstriksyon yo bay nan atik ki gen tit “Utilisez la skill jw.org pour Amazon Alexa” oswa atik ki gen tit “Utilisez l’action jw.org pour l’Assistant Google”.

Menmsi se pa tout aparèy elektwonik ki gen asistan vityèl yo, anpil telefòn, tablèt ak òdinatè pèmèt itilizatè yo telechaje aplikasyon Alexa a konsa yo gen aksè ak tout opsyon yo tou.

Nouvo opsyon sa yo sitou itil moun ki avèg oswa moun ki pa wè byen. Si w gen yon zanmi ki pa wè byen, èske w ta ka montre l itilize asistan vityèl ki sou aparèy li a oswa telechaje yon aplikasyon si l poko genyen l epi montre l ki jan pou l itilize l?