Nan kòmansman mwa out 2024, gen yon tanpèt twopikal ki te pran nesans nan oseyan Atlantik la. Rapidman, li te vin tounen siklòn Debby. Apre sa, nan dat 5 out 2024, siklòn nan ki te nan kategori 1 te frape toupre Steinhatchee, nan Florid, Etazini. Vitès van ki te frape zòn nan te rive 130 kilomèt alè. Mete sou sa, pandan siklòn nan t ap vanse li te lakòz yon douzèn tònad. Akoz gwo van ak gwo lapli, plizyè santèn milye moun pa t gen kouran. Gen omwen uit moun ki mouri Etazini.

Apre siklòn Debby fin frape Florid, li te pèdi fòs, li vin tounen yon tanpèt twopikal, e li pran direksyon Kanada. Nan vandredi 9 out 2024, nan mwens pase 24 èdtan, gen 22 santimèt lapli ki tonbe sou Kebèk, yon pwovens nan Kanada. Gwo lapli a te lakòz plizyè kay inonde e sèvis debaz yo pa t fonksyone byen kèk kote. Epitou, plizyè santèn moun te oblije deplase al yon kote ki plis an sekirite. Selon rapò yo, gen yon moun ki mouri Kanada.

Etazini

• Pa gen okenn nan frè ak sè nou yo ki mouri

• 1 pwoklamatè te entène lopital

• 23 pwoklamatè te oblije kite kay yo

• 7 kay sibi gwo domaj

• 60 kay sibi ti domaj

• 1 Sal Wayòm sibi ti domaj

Kanada

• Pa gen okenn nan frè ak sè nou yo ki mouri. Men, nou regrèt aprann gen yon etidyan Labib ki mouri nan yon glisman teren

• 1 pwoklamatè blese

• 23 pwoklamatè te oblije kite kay yo, men pifò nan yo gentan tounen lakay yo

• 2 kay sibi gwo domaj

• 165 kay sibi ti domaj

• Pa gen okenn Sal Wayòm ki sibi domaj oswa ki kraze

• Siveyan sikonskripsyon ak ansyen Ozetazini ak Kanada ap ede tout moun ki viktim yo nan domèn espirityèl e yo ba yo èd ki nesesè.

• Nan peyi Kanada, yo mete yon komite sekou sou pye pou bay èd ki nesesè.

Nou kontinye priye pou moun ki viktim anba gwo tanpèt sa a. Sa ki ankouraje n se paske n konnen Jewova pap manke pa montre li se “delivrans nou lè nou nan malè”. — Ezayi 33:2.