Toupatou sou tè a, nan dat ki te 1^ye septanm 2022 a, Temwen Jewova yo te kontan retounen nan aktivite tout moun konnen yo pou li a, anpalan de preche kay an kay. Mete sou sa, y ap fè yon kanpay espesyal kote y ap ofri moun yo etid Labib gratis. Pou kèk nan frè ak sè yo, se rekòmanse yo te rekòmanse yon aktivite yo abitye avè l e yo renmen. Pou kèk lòt, se premye fwa yo t al preche moun yo an pèsòn. Eksperyans ki pi ba yo se eksperyans kèk frè ak sè toupatou sou tè a te fè ki montre jan kòmansman ane sèvis 2023 a enteresan.

Nan dat 2 septanm 2022 a, Nicole ak Tina, de sè nan Petershagen nan nò Rhine-Westphalia, t ap preche nan yon bilding ki gen apatman. Men, yo pa t jwenn pèsonn lakay yo. Pandan yo t aprale, yo tande yo jèn dam ki rele yo. Dam nan di yo li pa t ka vin ouvri pòt la lè yo te frape a e l te mande yo pou yo vin pale sou Bib la avè l. Lè sè yo antre nan kay dam nan, yo wè yon Bib Tradiksyon monn nouvo a sou yon tab. Bib la sanble yon bib yo te li ladan l anpil. Dam nan fè konnen li te resevwa bib la lè l t ap viv ann Itali, sa gen twazan. Lè l te bwote vin ann Almay pandan pandemi an, li te pèdi kontak ak Temwen Jewova yo. Sè yo te pran nimewo telefòn dam nan e yo te envite l nan reyinyon. De jou apre, dam nan te asiste reyinyon ak de pitit li yo. Yo te fè aranjman pou yo fè etid avè l.

Manuel ak Karol Gastelum, ki pyonye espesyal nan tèritwa lang mam, rankontre yon dam byen janti ki envite yo antre. Dam nan pa t konnen Bondye gen yon non, donk yo kòmanse etidye leson 4 nan liv Ou kapab viv ak kè kontan pou toutan! an ki gen tit: “Kiyès Bondye ye?” Lè yo te li Ezayi 42:8, dam nan te sezi pou l wè non Bondye, Jewova, nan Bib pa l la.

Dam nan te pran kriye. Li di se kounye a li wè sa pa sifi pou l annik posede yon Bib. Li dwe aprann konn sa k ladan l pou l ka fè sa Bondye vle. Lè yo fini leson an, dam nan te vrèman kontan pou sa l te aprann yo. Li te di l ap pataje enfòmasyon an ak mari l. Frè ak sè Gastelum te fè aranjman pou yo kontinye vizite dam nan.

Pandan frè ak sè Nukamori t ap preche nan Yokohama, yo te sonnen nan yon kay ki gen yon aparèy pou yo pale ak moun nan kay la. Gen yon dam ki te salye yo nan aparèy la. Yo te bay non yo e yo te di yo se Temwen Jewova. Dam nan di koup la pou fè yon ti tann. Apre yon ti tan, li vin ouvri pòt la e l di: “M t ap tann Temwen Jewova yo vin vizite m.”

Dam nan fè konnen li te kòmanse etidye Labib ak Temwen Jewova yo lè l t ap viv Nagasaki. Li te bwote vin Yokohama pandan pandemi an men l te kontinye etid la sou Zoom. Nan kòmansman semèn nan, moun ki t ap etidye avè l la te di l: “Ap gen yon kanpay nan mwa septanm nan. Se setèn, Temwen Jewova ap vizite w. Lè sa a, mande moun nan pou l etidye Labib avèk ou an pèsòn.” Dam nan te kontan wè Temwen yo pa t pran pou yo vin vizite l. Li te fè konnen l ta renmen asiste reyinyon yo, e l te pran randevou pou yo kòmanse etid la avè l an pèsòn.

Apre yon mari ak madanm li te fin ofri yon dam yon etid Labib, dam nan te fè yo konnen, sa gen kèk ane, li te konn etidye ak Temwen Jewova yo e l te menm konn asiste reyinyon. Lè l te vin pèdi kontak ak Temwen Jewova yo, li te wont chèche yo paske l pa t ap viv ann amoni ak prensip ki nan Bib la. Lè l fin di sa, li tonbe kriye. Koup la te li Sòm 10:17 pou li e yo te fè l konnen Jewova pa bliye l. Epitou, yo te felisite l paske l te vle viv ann amoni ak prensip Jewova yo. Li te aksepte yon etid Labib e l te fè konnen pitit gason l lan ki gen 16 an te vle konn plis sou Bib la tou.

Lè koup la te tounen nan demen, dam nan ak tout pitit gason l lan t ap tann yo. Apre yo fin fè leson 1 nan bwochi Viv ak kè kontan! an, koup la te envite yo nan reyinyon ki t ap fèt nan wikenn nan. E yo te ale. Dam nan ak pitit gason l lan vle kontinye etid la e yo vle kontinye asiste reyinyon y.

Ramon te priye pou l jwenn yon moun pou l preche premye jou li t ap tounen preche kay an kay la. Lè l te frape premye pòt la, gen yon dam ki te ouvè pòt la toupiti pou l wè kiyès. Ramon salye l epi l di kiyès li ye. Li potko menm di pou ki rezon l vini, dam nan di: “Sa fè lontan m t ap tann moman sa a! Mwen te priye pou nou vin frape pòt mwen.”

Dam nan fè konnen sa gen kèk ane Temwen Jewova yo te vizite l e l te asiste yon reyinyon nan kongregasyon an. Men, li te deplase al yon lòt kote e l te pèdi kontak ak Temwen yo. Ramon fè l konnen nou pa t preche kay an kay pandan pandemi an. Li te li Sòm 37:29 pou dam nan e l te tou fè l konnen li kapab jwenn yon etid Labib. Dam nan te byen kontan aksepte etid la. Ramon te fè aranjman pou yon sè vizite dam nan.

Apre eksperyans sa a, Ramon di: “Mwen konnen Jewova ak zanj yo ap gide nou pou n jwenn moun ki vle koute yo.”

Nan Kentucky, pandan Katelyn Thompson t ap frape nan yon pòt, li te remake gen vèsè sou bwat kote yo mete lèt yo e te gen yon ti pankat nan jaden an ki ekri: “Jezi renmen w.” Lè Katelyn te fin frape nan pòt la, gen yon dam ki te vin ouvri. Katelyn di l kiyès li ye e l te fè l konnen akoz pandemi COVID-19 la Temwen Jewova yo pa t vizite moun yo lakay yo. Li te fè l konnen yo te ekri lèt e yo te rele moun yo nan telefòn pou ankouraje yo pandan pandemi an. Apre sa, Katelyn mande dam nan ki jan li menm ak fanmi l ye. Dam nan di l li te pèdi papa l pandan pandemi an. Li di tou: “M te resevwa lèt Temwen Jewova yo e sa te fè m santi se kòmsi Bondye t ap ban m sa m te bezwen nan moman an!” Katelyn te prezante dam nan kondoleyans li e l te egzamine leson 2 nan bwochi Viv ak kè kontan! an ak dam nan. Yo te li vèsè ki nan leson an e yo te konsantre sou esperans rezirèksyon an. Dam nan te tonbe kriye. Li fè konnen jou yo te vin preche l la te fè egzakteman ennan depi papa l te mouri. Youn te bay lòt nimewo telefòn yo e l te dakò pou Katelyn tounen vizite l. Nan pita, Katelyn te resevwa yon mesaj tèks. Se dam nan ki te ekri l, li te di l: “Mèsi! Mwen te vrèman bezwen ankourajman jodi a!”

Sa klè, Jewova beni desizyon pou nou rekòmanse preche kay an kay la ak kanpay pou kòmanse etid Labib ak moun yo. Nou pa ka tann pou n wè bèl rezilta n ap jwenn! — Jan 4:35.