Apati 1^ye avril 2022, Temwen Jewova yo rekòmanse reyini an pèsòn. Kèlkeswa enkyetid frè ak sè nou yo te ka genyen te ranplase ak kout ri, dlo nan je akoz kè kontan e ak bèl chante kantik Wayòm.

Pou kèk nan yo, se te premye fwa yo te nan yon Sal Wayòm.

Men sa frè Krzysztof Hoszowski, ki soti nan peyi Polòy, di: “Se premye fwa mwen vin nan reyinyon an pèsòn nan yon Sal Wayòm. Mwen te aprann laverite sou Bib la pa mwayen videyo konferans, e yo te pase batèm mwen sou Zoom. Mwen te gen yon ide sou jan reyinyon an pèsòn yo ye lè m te konn gade anpil videyo ki pale sou sa. Kounye a, mwen la nan reyinyon an, mwen kontan pou m wè lanmou, kè kontan ak jantiyès ki gen nan mitan frè ak sè yo.”

Apre pandemi COVID-19 la te kòmanse an mas 2020, Temwen Jewova yo te kòmanse reyini pa mwayen videyo konferans. Moun ki pa asiste reyinyon yo an pèsòn kounyez a ka toujou konekte pa mwayen videyo konferans.

Men sa frè Neil Campbell, nan Edennbou nan peyi Ekòs, di: “Kou mizik la te kòmanse jwe e mwen te kòmanse chante premye kantik la, tout san m te tresayi tèlman mwen te kontan ak frè m yo ankò pou premye fwa apre dezan.”

N ap di Jewova mèsi paske nou ka wè jan li beni nou pandan nou rekòmanse reyini an pèsòn. — Sòm 84:10.