Kongrè ki te fèt nan Cedar Point, Ohio, Ozetazini an 1922 a se yon kongrè Temwen Jewova yo konnen ki te enpòtan paske se nan kongrè sa a frè Joseph F. Rutherford te ankouraje tout moun pou yo preche Wayòm nan.

Men, gen yon lòt rezon ki fè kongrè sa a te enpòtan: Yo te anrejistre kongrè a. Pou kounye a, nou poko jwenn okenn kopi videyo sa a.

Gen yon foto yo te pran an septanm 1922 nan kongrè entènasyonal la ki montre yon estrad kote gen yon kamera k ap anrejistre evènman enpòtan sa a. Nan epòk la, yo te fèk kòmanse ap fè fim kote moun yo ap bouje.

Sanble videyo sa a te disponib pou piblik la. Pa egzanp, gen yon jounal ki te fè reklam pou fim nan. Li te ankouraje moun yo pou yo “gade videyo a lakay yo pou yo ka wè zanmi yo ak diskou batèm nan”. Jounal la te bay kèk konsèy pou preche tou, li te di: “Envite vwazen w vin gade l epi sèvi ak imaj kongrè a pou w ba yo temwayaj. Plase kòmann ou kounye a.”

Si w konn kote nou ka jwenn yon kopi videyo sa a, tanpri kontakte Depatman mize a nan adrès imel MuseumDonations@jw.org oswa ekri Syèj mondyal Temwen Jewova yo: World Headquarters of Jehovah’s Witnesses, 1 Kings Drive, Tuxedo Park, NY 10987. Nou swete jwenn videyo sa a ki enpòtan anpil nan istwa Temwen Jewova yo.