Toutpandan konba yo t ap vin pi plis nan rejyon Donètsk, nan peyi Ikrèn, frè Mykola Bozhedomov te fè plizyè ale vini Kramatòsk pou l ede anpil moun pou yo kite zòn kote ki gen gè a.

Men, frè Mykola mouri nan jou ki te 8 avril 2022 a akoz bonm yo te lage nan estasyon tren Kramatòsk la, ki nan rejyon Donètsk. Li te gen 58 an.

Se pa sèlman frè Mykola ki te mouri jou sa a, te gen yon sè ki te pami 50 moun ki te mouri yo. Mete sou sa, gen yon frè ki te pami plis pase 100 moun ki te blese nan jou sa a. Temwen ki pa t mouri nan atak la di se te de gwo eksplozyon ki te fèt, e annapre te vin gen moso fè ki t ap vole pasipala.

Men sa Nina, ki te marye ak Mykola depi 32 an, di: “Mari m te toujou mete enterè lòt moun anvan enterè pa l. Li te sitou toujou vle ede moun ki aje yo ak moun ki andikape yo. Men, chak fwa li te retounen al Kramatòsk, bagay yo te vin pi danjere. Se te dènye fwa li te sipoze ale nan zòn sa a.”

Nina ak Mykola te batize an 1997. Mykola te sèvi fidèlman kòm ansyen pandan plizyè ane. Frè ak sè yo kontinye ap soutni Nina, yo ede l e yo demontre lanmou pou li. Men sa Nina di: “Pawòl rekonfòtan yo di m ede m pandan moman difisil sa a.”

Epitou, Nina di gen vèsè ki rekonfòte l tou, sitou Ezayi 40:28-31. Nina di: “Jewova ede m rejwenn fòs. Mwen santi lanmou Jewova yon fason m pa t janm santi l anvan sa. Anvan sa, mwen te konn tande pale de lanmou sa a nan piblikasyon yo, men kounye a, m ap viv li toutbon.”

Nou kontinye ap priye pou Nina ansanm ak tout lòt moun ki gen moun pa yo ki mouri akoz gè a. Nou konnen Jewova ap kontinye soutni yo. — Sòm 20:2.