Nan kèk pati nan peyi Ikrèn, gen anpil wout, pon ak santral elektrik ki sibi gwo domaj oswa ki kraze nèt akoz pakèt eksplozyon ki genyen. Malgre sa, frè nou yo pa sispann asiste reyinyon kongregasyon yo epi patisipe nan lòt aktivite espirityèl yo, byenke pa gen kouran souvan.

Anastasia ak Debora, k ap sèvi kòm pyonye nan vil Kyèv, fè konnen yo pa gen kouran pandan omwen 12 èdtan nan jounen an. Yo chaje aparèy elektwonik yo lè yo kapab e yo itilize Entènèt sou telefòn yo pou yo asiste reyinyon yo. An jeneral, kou reyinyon an fini, koneksyon Entènèt la tou tonbe.

Lefètke gen pwoblèm kouran, sa fè moun pa ka chofe kay yo jan yo ta dwe a. Frè yo konn sèvi ak yon jeneratris pou bay kouran epi kenbe espas yo cho. Gen lòt frè ak sè ki deplase al kay fanmi yo paske kay sa yo gen chofaj. Tandiske, genyen ki jis rete sipòte fredi a. Men, erezman, anpil nan frè yo gen kay ak apatman ki chofe ak gaz, donk pwoblèm kouran an pa anpeche kay yo ret chofe.

Iryna, yon pyonye nan Ivano-Frankivsk, chwazi rete pozitif. Men sa l di: “Mwen pa ret konsantre sou sa mwen pa ka chanje. Donk, mwen viv nan moman prezan an. Mwen planifye sa m ap fè lè pa gen kouran, e m asire m mwen telechaje tout piblikasyon m ap bezwen yo.”

Aktout yo jwenn anpil difikilte, frè ak sè nou yo ann Ikrèn okipe anpil nan sèvis y ap bay Jewova a. Nou sèten Jewova ap kontinye beni efò y ap fè pou yo “fè sa ki byen”. — Galat 6:9.

Rive 6 desanm 2022, men rapò frè yo nan peyi Ikrèn voye pou nou. Chif sa yo baze sou rapò frè lokal yo te rive verifye. Sepandan, chif sa yo ka pi wo, paske li difisil pou nou kenbe bonjan kominikasyon ak tout zòn ki nan peyi a.

• 47 pwoklamatè mouri.

• 97 pwoklamatè blese.

• 11 537 pwoklamatè kite kay yo pou y al nan lòt zòn nan peyi a kote y ap plis an sekirite.

• 590 kay kraze.

• 645 kay sibi gwo domaj.

• 1 722 kay sibi ti domaj.

• 7 Sal Wayòm kraze.

• 19 Sal Wayòm sibi gwo domaj.

• 68 Sal Wayòm sibi ti domaj.

• Gen 27 komite sekou k ap travay pou ede frè ak sè yo ann Ikrèn.

• Komite sekou yo deja ede 54 212 pwoklamatè jwenn kote ki an sekirite pou yo rete.

• Gen 26 811 pwoklamatè ki deplase al nan lòt peyi, e frè ak sè nou yo nan peyi sa yo ap ede yo.