Depi 26 desanm 2022, pyonye pèmanan yo ak pyonye espesyal ann Ikrèn yo te gen posiblite asiste Lekòl pyonye nan zòn ki pa gen danje yo. Selon zòn nan, pyonye yo te ka asiste lekòl la swa an pèsòn swa sou Zoom. Malgre difikilte ki genyen, tankou bonm k ap tonbe, blakawout, pwoblèm ekonomik ak pwoblèm Entènèt, frè ak sè nou yo te fè tout sa yo kapab pou yo pran fòmasyon espesyal sa a. Kòm rezilta, yo vin plis renmen Jewova e lafwa yo vin pi djanm.

Men sa Natalia ki soti Krivyi Ri di: “Menm jan gen bagay ki la pou anpeche moun nwaye nan lanmè, se konsa lekòl la te ye pou mwen, li te anpeche enkyetid ak laperèz mwen genyen pote m ale.” Menm jan an tou, Anastasia ki soti Tchènivtsi di: “Lekòl la te ban m konviksyon Jewova vrèman renmen m. Ane ki sot pase a te chaje ak evènman terib, men lekòl la te egzakteman sa m te bezwen. M ap kontinye fè tout sa m kapab pou kontinye jwenn benediksyon Jewova.”

Okòmansman, lè Svitlana, yon pyonye nan Kitsman, te jwenn envitasyon pou l asiste lekòl la, li t ap enkyete l. Men sa l di: “Mwen te di Jewova sa k ap enkyete m, tankou pwoblèm ekonomik mwen genyen yo. Mwen te fè l konfyans e mwen pa t regrèt. Mwen te santi Jewova renmen m e li pran swen m.” Lè mari Svitlana ki pa Temwen Jewova wè efò Svitlana fè, li te kòmanse al ansanm avèk li nan reyinyon yo.

Pandan de fwa, elèv yo nan Zitomi te oblije deplase al nan yon sousòl akoz sirèn ki fè konnen gen bonm ki pral tonbe. Yo te sèvi ak dife bwa pou chofe espas la, konsa yo te ka rekòmanse klas la. Malgre pwoblèm sa yo, Valentyna, tou dènyeman ki te al viv Zitomi di: “Mwen pap janm bliye lekòl sa a. Mwen te santi se kòmsi mwen anba zèl Jewova.”

Menm jan ak pyonye nan anpil peyi, pyonye ann Ikrèn yo te kontan anpil lè yo te aprann yo redui kantite lè yo mande pou pyonye yo fè. Apre Yulia te fin tande anons lan, li te di: “Kè m te ranpli ak lanmou pou Jewova. Nan jou maten sa a, mwen te priye Jewova e m te sipiye l pou l ede m ret nan sèvis la. Mwen pa t konnen fason li t apral reponn priyè m, men mwen te konnen li t ap fè sa. Apre mwen te fin aprann yo redui kantite lè a, mwen te santi mwen vin gen plis apresyasyon pou tout sa Jewova fè pou mwen. Dènye nouvèl sa a te tankou yon bon desè mwen te jwenn nan fen lekòl la.”

Rive 24 janvye 2023, men rapò frè yo nan peyi Ikrèn voye pou nou. Chif sa yo baze sou rapò frè lokal yo te rive verifye. Sepandan, chif sa yo ka pi wo, paske li difisil pou nou kenbe bonjan kominikasyon ak tout zòn ki nan peyi a.

• 47 pwoklamatè mouri.

• 97 pwoklamatè blese.

• 8 953 pwoklamatè kite kay yo pou y al rete nan lòt zòn.

• 590 kay kraze.

• 645 kay sibi gwo domaj.

• 1 722 kay sibi ti domaj.

• 8 Sal Wayòm kraze.

• 17 Sal Wayòm sibi gwo domaj.

• 76 Sal Wayòm sibi ti domaj.

• Gen 26 komite sekou k ap travay pou ede frè ak sè yo ann Ikrèn.

• Gen 46 kay ki repare.

• Gen 5 Sal Wayòm ki repare.

• Komite sekou yo deja ede 54 445 moun jwenn kote ki an sekirite pou yo rete.

• Gen 27 655 pwoklamatè ki deplase al nan lòt peyi, e frè ak sè nou yo nan peyi sa yo ap ede yo.