11 MAS 2022
IKRÈN
MIZAJOU #2 | Frè ak sè yo kontinye demontre lanmou pandan gwo pwoblèm ki gen ann Ikrèn yo
Nan zòn ki gen gwo konba yo, tankou Mariyoupòl, pa gen kouran, chofaj ak siyal pou apèl telefòn ak Entènèt. Fenèt nan anpil kay kraze e se yon tikras manje ak dlo ki rete. Gen plis pase 2 500 frè ak sè ki pa ka kite Mariyoupòl. Nan kèk vil, tankou Boutcha, Tchènihiv, Ostomèl, Ipin, Kyèv ak Soumi, gen “ti pasaj” ki te ouvri, sa ki te pèmèt kèk moun kite vil sa yo. Se konsa anpil nan frè ak sè nou yo te rive kite vil sa yo pou y al yon kote ki an sekirite.
Gen yon frè ki gen 36 an, ki ansyen, ki pyonye e ki t ap viv Ostomèl, ki te rive chape ak madanm li ak paran l yo. Li esplike sa li te viv lè te vin gen afwontman nan vil li a, li di:
“Te gen elikoptè k ap vole anlè kay nou an e plizyè machin lame t ap fè patwouy nan wout yo. Sòlda yo te anvayi kay nou pandan nou te nan sousòl kay la. Gen youn nan sòlda yo ki te tire anpil bal nan direksyon kote nou te ye a. Gen bal ki t al frape valiz ijans manman m nan, men nou pa t blese. Nou te fè anviwon twa a katrèdtan san nou pa bouje oswa san nou pa fè okenn bri pandan te gen anpil bonm ak bri kout zam anlè tèt nou an. […] Nan demen maten, pandan nou t ap kite zòn nan nan machin nou, te vin gen afwontman ki kòmanse toupre nou an. Te gen machin blennde sou wout yo. […] Te gen gwo danje, men rete la t ap pi danjere toujou.
“Tout bagay sa yo gen gwo efè sou vi nou. Nou aprann fason pou nou suiv anpil prensip ki nan Bib la. Pa egzanp, fason pou nou pa enkyete nou pou demen, pou nou satisfè ak sa ki vrèman nesesè, epi fè Jewova konfyans nan sitiyasyon ki difisil anpil.”
Nou konnen Jewova, Bondye nou an, byen konnen tout sitiyasyon difisil frè ak sè nou yo nan peyi Ikrèn ap andire. Li pap janm sispann ede yo. — 2 Pyè 2:9.
Yon fanmi ki pran refij nan sousòl kay yo. Annapre, yo te ka kouri al nan yon zòn ki an sekirite.
Rive 10 mas 2022, men ki rapò frè yo nan peyi Ikrèn voye pou nou:
Sitiyasyon frè ak sè nou yo
2 pwoklamatè mouri.
8 pwoklamatè blese.
25 407 pwoklamatè kite kay yo pou y al nan lòt zòn nan peyi a kote y ap plis an sekirite.
25 kay kraze.
59 kay sibi gwo domaj.
222 kay sibi ti domaj.
7 Sal Wayòm sibi domaj.
Dispozisyon pou pote èd
Gen 27 komite sekou k ap travay pou ede frè ak sè yo ann Ikrèn.
Komite sekou yo deja ede 10 566 pwoklamatè jwenn kote ki an sekirite pou yo rete.
Gen 9 635 pwoklamatè ki deplase al nan lòt peyi, e frè ak sè nou yo nan peyi sa yo ap ede yo.
Lòt sijè ki enteresan
KONTINYE VEYE!
Anpil moun ap kite peyi Ikrèn — Sa Bib la fè konnen
Bib la fè konnen vrè rezon ki fè gen tout pwoblèm sa yo ak bonjan solisyon ki gen pou pwoblèm sa yo.
KONTINYE VEYE!
Larisi anvayi peyi Ikrèn — Èske se pwofesi ki nan Bib la k ap reyalize?
Gade pou ki rezon evènman sa a enpòtan.
KESYON MOUN POZE SOUVAN
Èske Temwen Jewova yo ede moun lè gen katastwòf natirèl?
Li sijè sa a e w ap wè jan nou ede kretyen parèy nou ak lòt moun lè gen katastwòf natirèl.