Sa tris pou fè n konnen gen de nan sè nou yo ki mouri akoz bonm yo te lage sou vil Mariyoupòl. Pou kounye a, toujou gen plis pase 2 000 nan frè ak sè nou yo ki pa ka deplase kite vil la akoz gwo afwontman ki genyen. Kèk jou anvan, te gen anviwon 150 Temwen ki te rive kite vil la. Frè ki nan komite sekou yo t ap eseye pote èd nan vil Mariyoupòl, men, ni yo menm ni lòt machin ki t ap pote èd yo te oblije tounen paske yo t ap tire sou yo. Gen yon bonm ki te eksploze nan yon lokal ki gen yon Sal Wayòm ak yon Sal asanble. Te gen anviwon 200 frè ak sè ki te kache nan sousòl Sal Wayòm nan lè sa a. Frè ak sè yo pa gen anyen, men machin yo detwi, sa ki fè l pi difisil pou yo kite vil la kounye a.

Men sa yon ansyen (li parèt nan foto ki pi ba a) ki te rive kite vil Mariyoupòl ansanm ak fanmi l di: “Nou pèdi kay nou, travay nou e n pèdi kontak ak zanmi nou yo. Vwayaj la, nòmalman ki ta dwe pran yon jou, te pran nou sis jou. Pandan nou t ap kondui [kite vil la], nou te wè plizyè bonm atè bo wout la ki pa eksploze k ap bay lafimen. Tout kote nou te pase, frè ak sè yo te ede nou jwenn kote pou n dòmi ak manje pou n manje. Nou santi Jewova, Papa nou an, t ap pran swen nou. […] Sa fè n detèmine plis toujou pou n fè Jewova konfyans nèt.”

Temwen Jewova ki soti Ikrèn yo al nan plizyè peyi ann Ewòp pou yo jwenn yon kote an sekirite pou yo rete. Pa egzanp, gen yon sèvitè ministeryèl ak madanm li ak twa pitit yo ki gen 7 an, 11 an ak 16 an ki te deplase al Pòtigal, kote yo gen fanmi yo ki Temwen Jewova. Apre yo te fin pase 11 èdtan sou fwontyè a anvan yo te rive travèse, yo te fè plis pase 4 000 kilomèt ap vwayaje pandan kat jou anvan yo rive lakay fanmi yo a. Yo te rive nan moman fanmi an t apral gen reyinyon. Malgre yo pa pale pòtigè, yo te kenbe bon abitid yo nan domèn espirityèl, yo te konekte pou reyinyon an. Frè ak sè yo nan kongregasyon an te sezi wè jan fanmi sa a gen kè kontan malgre sitiyasyon difisil yo ye.

Men sa yon lòt sè ki te chape ak fanmi l al ann Almay di: “Lefètke nou te li Labib, nou te reflechi sou bon bagay nou gen nan lavi nou e sou bèl esperans nou an, sa te ban nou anpil fòs e sa te ankouraje nou. […] Nou te santi men Jewova k ap gide nou e k ap ede nou pa mwayen frè ak sè nou yo. Yo te byen akeyi nou e yo te ede nou anpil ni ann Ikrèn, ni nan Ongri, e kounye a ann Almay!”

Sa klè, Jewova pa sispann ede tout frè ak sè nou yo nan peyi Ikrèn. — Sòm 145:14.

Rive 16 mas 2022, men rapò frè yo nan peyi Ikrèn voye pou nou. Sepandan, chif nou gen la yo ka pi wo lontan, paske li difisil pou nou kenbe bonjan kominikasyon ak tout zòn ki nan peyi a:

• 4 pwoklamatè mouri.

• 19 pwoklamatè blese.

• 29 789 pwoklamatè kite kay yo pou y al nan lòt zòn nan peyi a kote y ap plis an sekirite.

• 45 kay kraze.

• 84 kay sibi gwo domaj.

• 366 kay sibi ti domaj.

• 16 Sal Wayòm sibi domaj.

• Gen 27 komite sekou k ap travay pou ede frè ak sè yo ann Ikrèn.

• Komite sekou yo deja ede 20 981 pwoklamatè jwenn kote ki an sekirite pou yo rete.

• Gen 11 973 pwoklamatè ki deplase al nan lòt peyi, e frè ak sè nou yo nan peyi sa yo ap ede yo.