Nou kontinye priye pou frè ak sè nou yo nan Mariyoupòl, kote bonm kontinye ap tonbe e afwontman yo pa sispann. Malerezman, gen sis nan frè ak sè nou yo ki mouri nan eksplozyon bonm yo. Antou, nou gen dis frè ak sè ki pèdi lavi yo nan peyi Ikrèn. Mete sou sa, jan yo te di sa nan nouvèl, semèn pase a yo te lage bonm sou yon sal teyat kote te gen plis pase 1 000 moun ki te pran refij ladan l. Pa gen youn nan frè ak sè nou yo ki mouri nan atak sa a, men, kèk ladan yo blese.

Gen anviwon 750 frè ak sè nou ki chape kite Mariyoupòl, alòske gen apeprè 1 600 ki la toujou. Anpil ladan yo nan pati lès vil la, ki anba kontwòl Larisi kounye a.

Jan nou te deja di sa, gen anviwon 200 frè ak sè ki pran refij nan sousòl yon lokal ki gen yon Sal Wayòm ak yon Sal asanble. Lè l te posib pou yo te fè yon ti kominike ak frè sa yo, men sa yo fè konnen:

“Pandan bonm yo t ap tonbe, gen plizyè frè ak sè ki te pè anpil. Kèk ladan yo te kòmanse kriye. Lè nou te tande eksplozyon yo deyò a, nou te panse nou t ap mouri swa nan eksplozyon yo swa akoz dife ki te genyen an. Gen yon ansyen ki te ankouraje nou chante kantik. Nou te chante ant 10 a 15 kantik ansanm youn dèyè lòt. Plis eksplozyon yo te fò se plis nou te chante fò. Epi nou te li Sòm 27 e n te pale sou li. Apre sa, nou tout te kòmanse pale sou vèsè nou pi renmen e n te esplike sa k fè yo ankouraje nou. [...] Nou te rann nou kont vrèmanvre Jewova se ‘Papa ki gen kè sansib la, Bondye tout konsolasyon an’, ki kapab kalme nou nan moman ki pi difisil yo.” — 2 Korentyen 1:3, 4.

Gen ansyen ak frè nan komite sekou a ki demontre lespri sakrifis lè yo deplase al chèche frè ak sè yo e lè yo pote manje ak medikaman pou yo lè yo bezwen sa, pafwa yo riske lavi yo pou yo fè sa. Pafwa, frè sa yo oblije ranpe atè pou bal y ap tire yo pa pran yo. Nou fyè de frè sa yo ki “riske vi yo” pou frè ak sè yo. — Women 16:4.

Kòm pa gen ni gaz ni kouran, gen sè nan vil la ki fè manje deyò sou dife. Apre sa, yo pote manje yo bay pwoklamatè ki granmoun e ki gen andikap yo. Anpil nan frè ak sè yo pèdi kay yo, machin yo, tout sa yo te genyen, men yo rekonesan pou lanmou ak swen yo jwenn nan men kwayan parèy yo.

Frè ak sè yo eseye kenbe woutin yo nan domèn espirityèl kote yo pran refij la lè yo etidye Bib la ansanm e lè yo pale sou mesaj ki nan Bib la ak lòt moun lè sa posib.

Rive 22 mas 2022, men rapò frè yo nan peyi Ikrèn voye pou nou. Sepandan, chif nou gen la yo ka pi wo lontan, paske li difisil pou nou kenbe bonjan kominikasyon ak tout zòn ki nan peyi a:

• 10 pwoklamatè mouri.

• 27 pwoklamatè blese.

• 33 180 pwoklamatè kite kay yo pou y al nan lòt zòn nan peyi a kote y ap plis an sekirite.

• 78 kay kraze.

• 102 kay sibi gwo domaj.

• 484 kay sibi ti domaj.

• 1 Sal Wayòm kraze.

• 4 Sal Wayòm sibi gwo domaj.

• 18 Sal Wayòm sibi ti domaj.

• Gen 27 komite sekou k ap travay pou ede frè ak sè yo ann Ikrèn.

• Komite sekou yo deja ede 25 069 pwoklamatè jwenn kote ki an sekirite pou yo rete.

• Gen 14 308 pwoklamatè ki deplase al nan lòt peyi, e frè ak sè nou yo nan peyi sa yo ap ede yo.