Malerezman, rive 29 mas 2022, gen sèt frè ak sè anplis ki mouri nan vil Mariyoupòl. Antou, gen 17 frè ak sè ki mouri nan peyi Ikrèn.

Komite sekou yo nan peyi Ikrèn ap travay san pran souf pou yo pote èd, e yo menm riske lavi yo pou yo chèche kwayan parèy yo nan zòn ki gen gwo dega akoz lagè a.

Pa egzanp, frè ki nan komite sekou yo te rive pote manje, medikaman ak lòt bagay ki nesesè nan vil ki gen gwo dega yo, tankou Kakiv, Kramatòsk ak Mariyoupòl. Gen yon manm komite sekou a ki konn fè yon jounen ap vwayaje sou yon distans plis pase 500 kilomèt, kote li oblije kanpe plizyè fwa akoz militè yo k ap fè tchèk, pou l ka pote manje ak medikaman pou anviwon 2 700 pwoklamatè.

Epitou, komite a te òganize pou gen transpò pou ede frè ak sè yo chape kite zòn ki gen gè yo. Men sa yon frè nan komite Tchènihiv lan di: “Lè lame a te kòmanse lage bonm sou kay kote moun rete, li te klè se te yon gwo danje pou moun ret nan vil la. Kòm pa t gen kouran ak Entènèt, ansyen yo te konn al nan vil la, anba bonm, pou ka fè pwoklamatè ki pran refij nan sousòl yo konnen gen transpò ki disponib pou ka ede yo chape kouri kite vil la.”

Mèt yon biznis transpò te dakò sèvi ak machin ak bis li yo, li te fè nèf vwayaj pou ede 254 nan frè ak sè nou yo chape kite Tchènihiv. Yon fwa, li te menm sèvi ak traktè li genyen pou ranje wout la pou bis li a ka pase. Frè ak sè yo gen anpil rekonesans pou èd konsa.

Sa fè nou mal anpil pou moun ki gen moun pa yo ki mouri pandan gè sa a k ap kontinye. Nou tout ap tann reyalizasyon pwomès nou jwenn nan Bib la kote lanmò ak lapenn pral disparèt. — Revelasyon 21:3, 4.

Rive 29 mas 2022, men rapò frè yo nan peyi Ikrèn voye pou nou. Sepandan, chif nou gen la yo ka pi wo lontan, paske li difisil pou nou kenbe bonjan kominikasyon ak tout zòn ki nan peyi a:

• 17 pwoklamatè mouri.

• 35 pwoklamatè blese.

• 36 313 pwoklamatè kite kay yo pou y al nan lòt zòn kote y ap plis an sekirite.

• 114 kay kraze.

• 144 kay sibi gwo domaj.

• 612 kay sibi ti domaj.

• 1 Sal Wayòm kraze.

• 7 Sal Wayòm sibi gwo domaj.

• 23 Sal Wayòm sibi ti domaj.

• Gen 27 komite sekou k ap travay pou ede frè ak sè yo ann Ikrèn.

• Komite sekou yo deja ede 34 739 pwoklamatè jwenn kote ki an sekirite pou yo rete.

• Gen 16 175 pwoklamatè nan pwoklamatè ki deplase yo k al nan lòt peyi, e frè ak sè nou yo nan peyi sa yo ap ede yo.