Nou kontan fè nou konnen frè ak sè yo te rive selebre Memoryal lanmò Kris la toupatou nan peyi Ikrèn grasa benediksyon Jewova bay pèp li a k ap viv nan peyi a. Nan lwès peyi Ikrèn, yo te fè Memoryal la nan plizyè Sal Wayòm pou frè ak sè ki te oblije deplase kite kote yo t ap viv la. Pifò kote, frè yo te fè Memoryal la an ti gwoup, e moun ki pa t ka kite lakay yo te suiv li sou videyo konferans.

Nan pifò kote nan peyi a, te gen sirèn nan jou Memoryal la pou fè konnen yo pral lage bonm. Lè li t apral lannuit, pa t gen bri sirèn ankò. Men sa Sherhiy ki nan Droujkivka, nan rejyon Donètsk, di: “Nou te priye pou Memoryal la pa t kanpe akoz y ap lage bonm. Yon ti tan anvan Memoryal la, yo te sispann lage bonm, e pa t gen bri sirèn ankò.”

Yon gwoup pwoklamatè ki aje e ki enfim ki nan Nemichayeve, toupre Kyèv, pa t ka asiste reyinyon pandan plis pase yon mwa. Yo te priye pou yo ka asiste Memoryal la. Vitaliy, yon ansyen, te ede gwoup pwoklamatè sa a selebre Memoryal la. Men sa l di: “Pa t gen kouran, donk nou te sèvi ak flach pou n fè Memoryal la. Pa t gen chofaj. Nou pa t gen mizik, se sa k fè pitit fi m nan te jwe vyolon pou nou ka chante kantik yo.”

Men sa Oleksandr, yon ansyen k ap viv nan zòn ki gen afwontman yo, di: “Pandan kanpay envitasyon Memoryal la, nou pa t ka ekri lèt voye bay moun ki nan tèritwa kongregasyon nou an, paske yo te lage bonm sou kay yo, e moun yo te kite kay yo. Donk, nou te envite moun nou konnen, moun nou te rankontre nan sousòl yo, ak moun nou te rankontre lè yo t ap fè nou kite kote nou te ye yo. Anpil nan moun nou te rankontre yo pa t janm tande pale de Temwen yo anvan sa. Anpil nan yo te asiste Memoryal la avèk nou.”

Byenke nou poko gen yon rapò konplè sou tout kongregasyon ki nan peyi Ikrèn, nou aprann gen plis pase 210 000 moun ki te asiste Memoryal la.

Men sa youn nan frè nou yo nan peyi Ikrèn di sou Memoryal la konsènan jan l santi l: “Menm jan limyè ki nan yon fa fè maren yo konnen yo toupre rive sou rivaj la, se konsa tou Memoryal la ban m asirans jou Jewova a toupre rive. Memoryal ane sa a ranfòse konviksyon mwen genyen an plis toujou.”

Rive 22 avril 2022, men rapò frè yo nan peyi Ikrèn voye pou nou. Sepandan, chif nou gen la yo ka pi wo, paske li difisil pou nou kenbe bonjan kominikasyon ak tout zòn ki nan peyi a.

• 35 pwoklamatè mouri.

• 60 pwoklamatè blese.

• 43 792 pwoklamatè kite kay yo pou y al nan lòt zòn nan peyi a kote y ap plis an sekirite.

• 374 kay kraze.

• 347 kay sibi gwo domaj.

• 874 kay sibi ti domaj.

• 1 Sal Wayòm kraze.

• 10 Sal Wayòm sibi gwo domaj.

• 27 Sal Wayòm sibi ti domaj.

• Gen 27 komite sekou k ap travay pou ede frè ak sè yo ann Ikrèn.

• Komite sekou yo deja ede 44 971 pwoklamatè jwenn kote ki an sekirite pou yo rete.

• Gen 19 961 pwoklamatè ki deplase al nan lòt peyi, e frè ak sè nou yo nan peyi sa yo ap ede yo.