Filyal Ikrèn nan, ansanm ak 27 komite sekou, kontinye ap ede frè ak sè ki kite kote yo te rete e k al ret yon lòt kote nan peyi a. Depi lè gè a te kòmanse a, frè yo voye plis pase 250 tòn èd al nan peyi Polòy, sa ki gen ladan l manje, rad, ak pwodui ijyèn. Epitou, frè k ap viv ann Ikrèn yo distribye plis pase 80 tòn manje nan zòn ann Ikrèn ki an sekirite yo.

Men sa yon sè ki rele Valentyna te ekri apre l te fin resevwa èd nan men frè yo ki nan komite sekou a: “Lè gè a te kòmanse, sa te danjere anpil pou yon moun ret nan vil la. Donk, m te deplase al nan yon ti vil nan rejyon Chèkasi. Sa fè de mwa depi m nan ti vil sa a. Frè ak sè yo nan kongregasyon ki nan zòn nan pran ka m anpil. Yo te pot plizyè bwat ki gen manje ak pwodui ijyèn pou mwen. Apre tout èd sa a mwen jwenn yo, m santi m pa gen mo. Nan youn nan bwat yo, te gen yon desen ak yon kat yon ti pitit ki gen katran ki rele Blanca te voye pou mwen [...]. Mwen konsève desen sa a. Se pa ti rekonesan mwen rekonesan anvè tout frè m ak sè m yo e sitou anvè Jewova.”

Men sa yon lòt sè ki rele Valentyna, ki gen 83 an e ki andikape, ki soti Syeverodonètsk, te ekri: “Lè gè a te kòmanse, m t ap viv poukò m. Sèl pitit gason m te genyen an mouri avan gè a. Lè yo t ap plede bonbade vil la pandan tout jounen an, sa te fè m pè anpil. Pa t gen ni dlo, ni kouran, ni gaz, e siyal Entènèt la pa t bon. M vrèman rekonesan anvè frè ki te riske lavi yo pou yo te ede m.”

Men sa l di ankò: “Annapre, frè yo te mennen m, ansanm ak de lòt sè ki andikape, nan vil Dnipro, yon vil ki an sekirite. Nan vil sa a, frè yo te ede m jwenn yon kote pou m rete. Kounye a, m ap viv ak yon fanmi Temwen Jewova k ap pran swen m. Nou viv tankou fanmi. Yo te menm ede m jwenn yon telefòn entèlijan pou m ka asiste reyinyon epi patisipe ladan yo. M pap janm bliye tout sa frè yo fè pou mwen.”

Nou kontan e nou rekonesan anvè Jewova, Papa nou an ki renmen nou, ki kontinye pran swen frè ak sè nou yo ann Ikrèn yon fason pou yo pa “manke anyen ki bon”. — Sòm 34:10.

Rive 7 jen 2022, men rapò frè yo nan peyi Ikrèn voye pou nou. Chif sa yo baze sou rapò frè lokal yo te rive verifye. Sepandan, chif sa yo ka pi wo, paske li difisil pou nou kenbe bonjan kominikasyon ak tout zòn ki nan peyi a.

• 42 pwoklamatè mouri.

• 82 pwoklamatè blese.

• 46 145 pwoklamatè kite kay yo pou y al nan lòt zòn nan peyi a kote y ap plis an sekirite.

• 469 kay kraze.

• 540 kay sibi gwo domaj.

• 1 405 kay sibi ti domaj.

• 5 Sal Wayòm kraze.

• 8 Sal Wayòm sibi gwo domaj.

• 33 Sal Wayòm sibi ti domaj.

• Gen 27 komite sekou k ap travay pou ede frè ak sè yo ann Ikrèn.

• Komite sekou yo deja ede 50 663 pwoklamatè jwenn kote ki an sekirite pou yo rete.

• Gen 22 995 pwoklamatè ki deplase al nan lòt peyi, e frè ak sè nou yo nan peyi sa yo ap ede yo.