Nan dat 7 out 1993, nan vil Kyèv, ann Ikrèn, te gen 7 402 frè ak sè ki te batize nan kongrè entènasyonal Temwen Jewova yo ki te gen tit “L’enseignement divin”. Nan tout istwa Temwen Jewova yo pou epòk nou an se pi gwo kantite moun ki te batize nan yon sèl kongrè. Moun ki te batize nan moman sa a toujou sonje jou a.

Volodymyr ak Alla, madanm li, te pami moun ki te batize jou sa a. Se premye fwa yo te asiste yon kongrè. Te gen prèske 65 000 moun ki te soti nan 16 peyi ki te asiste kongrè sa a. Men sa Volodymyr ak Alla di: “Kongrè sa a ki te fèt nan Kyèv la montre nou fè pati yon fanmi ki gaye sou tout kò tè a. Se pa jis yon bagay nou li nan piblikasyon nou yo. Piske nou asiste kongrè pandan tout ane sa yo, nou rive fè konesans ak anpil frè ak sè e grasa egzanp yo, nou vin konprann nou kapab gen kè kontan toutbon lè nou mete Jewova an premye nan lavi nou.”

Oleksandr, yon frè ki moun Kyèv, te pami plis pase 50 frè ak sè ki nan kongregasyon l lan ki te batize nan kongrè sa a. Men sa l di konsènan anbyans ki te genyen jou sa a: “Lanmou ak tèt ansanm ki te gen pami frè ak sè yo te fè dlo koule nan je m. Sa te fè m kwè mwen fè pati yon fanmi frè ak sè ki gen lanmou nan mitan yo. Jis kounye a, mwen toujou santi m menm jan an ak lè m t ap asiste kongrè a.”

Men sa Liudmyla, yon sè ki te batize jou sa a di lè l ap panse ak kongrè a e ak batèm li: “Pwogram kongrè ‘L’enseignement divin’ an te ede m konsantre sou objektif mwen genyen nan sèvis m ap bay Jewova. Mwen te gen objektif pou m antre nan sèvis aplentan. Mwen te reyalize objektif sa a e kounye a sa fè anviwon 28 an depi m nan sèvis aplentan. Jewova te toujou soutni m pandan tout ane sa yo.”

Vrèmanvre, kongrè entènasyonal “L’enseignement divin” ki te fèt an 1993 nan vil Kyèv la se yon evènman moun pa ka bliye. Depi lè sa a, kantite pwoklamatè nan peyi Ikrèn te prèske vin twa fwa plis. Jodi a, Jewova kontinye beni moun ki met kouraj sou yo pou yo pran pozisyon pou li, pou yo vwe lavi yo ba li e pou yo batize. — Egzòd 32:26.