Gen prèske 47 000 Temwen Jewova ki te oblije kite kay yo akoz lagè ki gen ann Ikrèn nan. Gen anpil moun ki te oblije ale nan lòt zòn nan peyi a ki an sekirite, e kwayan parèy yo ba yo rad, manje, yon kote pou yo rete ak lòt bagay yo bezwen. Byenke frè ak sè sa yo, ki renmen akeyi moun, gen gwo pwoblèm ekonomik, yo kontan fè sa yo kapab pou yo ede frè yo ki nan bezwen.

Olha ak mari l ki pa Temwen Jewova ap viv nan Ouman. Yo te akeyi 300 pwoklamatè antou pandan premye de mwa gè a. Anpil nan frè ki te oblije kite kay yo jis rete pandan yon nuit, apre sa, yo kontinye vwayaj yo. Byen souvan, se nan mitan lannuit yo fè Olha konnen gen moun ki nan wout ki pa lwen rive lakay li. Yon lè, Olha te akeyi 22 frè ak sè anmenmtan. Eksperyans sa a te ede Stanislav tou, yon pitit gason Olha ki gen 18 an, li te ba l okazyon pou l aprann renmen bay. Byen souvan, pitit gason l lan dòmi atè, li kite kabann nan pou frè ak sè ki te oblije kite kay yo.

Men sa Olha di: “Mwen kontan anpil paske pandan moman difisil sa a mwen ka ede pèp Jewova a. Se pa ti kontan sa fè m kontan.”

Andriy ak Liudmyla, madanm li, te akeyi 200 Temwen lakay yo sou yon peryòd senk semèn. Yon lè, yo te akeyi 18 moun nan menm nuit lan. Men sa Andriy di: “Nou te suiv direksyon filyal la bay pou nou gen yon ti manje lakay nou. Nou te sèvi avèk li pou nou ede frè ak sè yo pandan yon semèn edmi. Frè ak sè yo te konn kite ti kat pou nou ki gen kòb anndan yo, e nou te konn sèvi ak kòb sa yo pou nou achte kèlkeswa manje nou te ka jwenn pou pwochen moun nou t ap gen pou nou akeyi yo. Epitou, komite sekou a te bay manje. Se sa k fè nou pa t manke anyen.”

Nan mwa mas, Vita ki rete Ivano-Frankivsk, te kite apatman l te ye a pou l al viv ak sè l la pou frè ak sè ki oblije kite kay yo ka rete nan apatman l lan. Men sa Vita di: “Mwen pa t ap di sa m fè a se yon sakrifis, men se yon fason pou m montre mwen renmen yo. Sa m fè pou frè ak sè ki te oblije kite kay yo fè m kontan. Nou se yon sèl fanmi.”

Natalia ap viv ak mari l ak Habriela, pitit fi l, nan Tènopil. Yo tout te pèdi travay yo lè gè a te kòmanse, e yo te oblije pran nan pifò ti kòb yo te sere pou yo pran swen tèt yo. Malgre sa, yo te dispose akeyi yon sè ak pitit fi l ki t ap kouri kite kay yo.

Men sa Natalia di: “Mwen sonje eksperyans yon sè ann Afrik ki pa t gen gwo mwayen ki te akeyi 14 frè ak sè lakay li ki te vin nan kongrè, e frè ak sè sa yo pa t manke anyen.” Li di eksperyans sa a te ede l mete enterè lòt moun anvan.

Byenke frè ak sè nou yo ann Ikrèn ap fè fas ak sitiyasyon ki difisil, avèk sajès yo mete konfyans yo nan Jewova toutpandan yo “pran abitid akeyi moun”. — Women 12:13.