Sa pa gen twò lontan, kou dapèl nan vil Milan, nan peyi Itali, te pran yon desizyon an favè yon mari ak madanm li ki Temwen Jewova anrapò ak swen sante pou pitit yo. Desizyon kou dapèl la pran an montre aklè lefètke paran yo mande pou yo pa bay pitit yo san, se pa yon rezon pou tribinal yo gen dout sou kapasite paran yo genyen pou yo pran bon desizyon pou pitit yo. Kou dapèl la deside paran yo gen dwa pou yo pa dakò yo bay pitit yo san akoz kwayans relijye yo genyen.

Nan mwa septanm 2019, yon mari ak madanm li ki Temwen te mennen pitit fi yo, ki gen dis mwa, lopital paske pitit la te tonbe e li te blese. Doktè yo te wè pitit la ap bezwen fè yon operasyon paske li te frape nan tèt, sa ki te lakòz san kaye nan tèt li. Doktè yo te rive fè operasyon an san yo pa ba l san.

Annapre, byenke pitit la t ap byen reprann li e ka a pa t twò grav ankò, gen yon doktè ki te mande paran yo pèmisyon pou bay pitit la san. Dapre doktè a, se t ap yon lòt tretman anplis pou ede pitit la. Paran yo te mande pou yo itilize lòt tretman kote yo pa itilize san pito.

Men, doktè a te prefere rele lapolis ak biwo komisè gouvènman an pito olye li fè sa paran yo te mande a. Biwo komisè a te jwenn yon otorizasyon nan men yon tribinal ki la pou jere zafè fanmi. Otorizasyon sa a te retire sou otorite legal paran yo genyen, e li te bay direktè lopital la otorite pou l deside ki swen sante pitit la dwe jwenn. Men, doktè yo pa t janm bay pitit la san paske yo pa t wè sa nesesè.

Anpil chèn televizyon ak jounal nan peyi Itali t ap pale de sitiyasyon sa a. Anpil nan yo te fè konnen tipitit la rive sove grasa otorizasyon tribinal la te bay pou yo ba l san an, alòske se pa t vre.

Nan dat ki te 10 septanm 2020 an, kou dapèl la te anile desizyon tribinal ki la pou jere zafè fanmi an te pran ki te retire sou otorite legal paran yo genyen an. Kou dapèl la fè konnen tribinal la pa t dwe bay otorizasyon li te bay la e li pa t menm gen otorite pou l jije ka sa a.

Men sa kou dapèl vil Milan an te di nan desizyon li te pran an: “Lefètke paran yo pa t dakò kesyon bay san an akoz kwayans relijye yo genyen, sa pa montre yo se move paran e yo pa dwe kontinye gen otorite pou yo pran desizyon pou pitit yo.” Ane pase a sèlman, twa kou dapèl nan peyi Itali konfime dwa paran ki Temwen yo genyen pou yo mande tretman ki pa itilize san pou pitit yo.

Li enpòtan pou otorite legal ak otorite sante yo konprann Temwen Jewova yo pa moun ki kont lamedsin ni yo pa moun ki chita ap tann mirak fèt pou moun pa yo geri. An reyalite, y ap chèche pi bon swen sante nan pi bon lopital yo. Yo chèche lopital ki byen ekipe e ki gen eksperyans nan fè yo jwenn tretman k ap respekte lafwa yo genyen. Sèl sa yo mande se pou doktè yo pa sèvi ak tretman ki gen rapò ak san lè y ap pran swen yo. Gen anpil gwo doktè nan gwo lopital nan lemonnantye ki pa gen pwoblèm pou yo bay bonjan swen sante san yo pa itilize san.

Nou gen anpil rekonesans pou desizyon kou dapèl sa yo pran ki ede frè ak sè nou yo pandan yo kenbe detèminasyon yo pran pou yo chwazi swen sante ki akseptab pou pitit yo. — Travay 15:29.