Nan dat ki te 3 avril 2021 an, Labib — Tradiksyon monn nouvo a te parèt sou fòma enprime ak fòma elektwonik nan lang kanbodjen. Yo te anrejistre pwogram nan alavans e yo te pase l pou tout kongregasyon ak gwoup nan peyi Kanbòj. Frè Kenji Chichii, ki nan Komite filyal peyi Japon a, te anonse tradiksyon an.

Gen anviwon 16 milyon moun ki pale lang kanbodjen. Gen plis pase 1 100 pwoklamatè k ap sèvi nan tèritwa ki pale lang kanbodjen.

Men sa frè Masahiro Harada, ki nan Komite filyal peyi Japon, di: “Nou kwè tradiksyon sa a pral ede moun ki pral li l yo wè bèl kalite Bondye yo, tankou lanmou, konpasyon ak mizèrikòd. Nou espere tradiksyon sa a ap ede plis moun sensè pwoche bò kote Jewova epi ba li glwa.”

Gen de ekip nan Depatman tradiksyon an ki te travay pandan katran pou fini pwojè a, e chak ekip te gen twa tradiktè. Men sa yon moun nan ekip tradiksyon an di: “Nouvo tradiksyon an pa sèvi ak ekspresyon ki pase mòd. Li touche kè m byen fasil. Mwen gen menm santiman ak sa ki di nan Sòm 139:17 la ki di: ‘Se sa k fè panse w yo gen anpil enpòtans pou mwen.’”

Men sa yon lòt tradiktè di: “Mwen gen konviksyon lè frè ak sè yo li nouvo tradiksyon sa a, sa ap fè yo pwoche pi pre Jewova. Lè yo santi yo poukont yo, y ap santi yo byen lè yo li tradiksyon sa a. Y ap santi yo an sekirite lè y ap fè fas ak danje. Y ap santi yo anpè lè yo panike. E y ap jwenn fòs anba eprèv k ap kraze yo.”

Nou gen konviksyon tradiksyon sa a ap ede plis moun toujou pou yo konnen Jewova, Gran Kreyatè yo a, epi ba li onè ak glwa li vrèman merite. — Revelasyon 4:11.