Tout 15 moun ki nan Komite dwa moun nan Nasyonzini (CCPR) kondane peyi Kigistan paske li vyole bonjan dwa Temwen Jewova yo genyen pou yo pratike relijyon yo nan twa zòn ki nan peyi a. Nan yon dokiman ki gen sèt paj CCPR la prepare, yo bay peyi Kigistan lòd pou l bay Temwen yo “bonjan dedomajman” paske l te vyole dwa Temwen yo, e pou peyi Kigistan “fè tout sa l kapab pou anpeche mòd bagay konsa rive alavni”. Se dezyèm fwa CCPR kondane peyi Kigistan paske li vyole dwa Temwen yo.

Nan ane 1993, yo te anrejistre premye gwoup Temwen Jewova ki te nan peyi Kigistan. Leta te rekonèt Temwen yo nan ane 1998. Donk, pandan anpil anpil ane, Temwen Jewova ki nan peyi a te gen libète pou yo adore. Men, pandan plis pase dizan, Komite Leta sou zafè relijyon (SCRA) te refize rekonèt Temwen Jewova ki nan zòn Òch, Narin ak Djalal-Abad, ki nan sid Kigistan, malgre frè yo nan zòn nan ranpli plizyè demann deja. Kòm SCRA refize rekonèt Temwen yo nan zòn sa yo, frè ak sè yo gen restriksyon pou yo adore Bondye, pou yo fè reyinyon relijye, pou yo fè asanble, oswa pou yo lwe oswa achte lokal kote yo ka adore. Kidonk, CCPR wè peyi Kigistan gen prejije kont Temwen Jewova ki nan twa zòn sa yo akoz kwayans relijye yo genyen.

CCPR atann pou otorite nan peyi Kigistan yo ‘fè tout sa yo kapab pou anpeche mòd bagay sa yo rive alavni’. Peyi Kigistan gen 180 jou pou l fè CCPR la konnen efò yo fè pou yo suiv sa ki di yo.

Nou poko konnen si otorite nan peyi Kigistan yo ap obeyi desizyon CCPR la, epi pèmèt frè ak sè nou yo nan zòn sa yo pratike relijyon yo. Men, espè nan dwa moun ki nan Fowòm 18 la ap suiv avèk anpil atansyon sitiyasyon an, epi yo fè konnen SCRA “pa t okipe yon dezisyon menm jan an Nasyonzini te pran nan ane 2019”.

Kit peyi Kigistan obeyi, kit li pa obeyi desizyon Nasyonzini an, nou gen asirans Jewova konnen sa frè ak sè nou yo ap andire nan peyi Kigistan (Sòm 37:18). Papa nou an ki nan syèl la ki renmen nou ap kontinye beni yo pou fidelite yo ak kouraj yo. — Sòm 37:28.