Nan dat ki te 23 avril 2021 an, tribinal rejyonal travay nan vil Smolensk fè konnen frè Yevgeniy Deshko, frè Ruslan Korolyov ak frè Valeriy Shalev koupab. Frè Korolyov ak frè Shalev ap gen pou pase sizan edmi nan prizon si yo arete yo ankò pou menm bagay yo. Frè Deshko li menm ap gen pou l pase sizan nan prizon si yo arete l ankò pou menm bagay yo.

Yevgeniy Deshko

• Dat ak kote li fèt: 1989 (Sotchi).

• Byografi: Li travay kòm yon pwofesyonèl nan bay masaj, li chofè e li se yon elektrisyen. Li te grandi nan yon fanmi kote paran l yo Temwen Jewova. Li te vin gen gwo respè pou prensip nan Bib la, se sa k fè li pa t vle fè sèvis militè. Li te batize nan ane 2012. Soti ane 2012 rive ane 2014, li te fè sèvis sivil nan yon lopital kote li te konn ap ede moun ki granmoun.

Ruslan Korolyov

• Dat ak kote li fèt: 1982 (Smolensk).

• Byografi: Depi lè l jèn, li te renmen aprann fason pou l ranje aparèy elektwonik. Annapre, li te vin yon mekanisyen. Li te nan lame peyi Larisi a. Li te kòmanse etidye ak Temwen Jewova yo, e verite ki nan Bib la te rekonfòte l. Li te batize nan ane 2004.

Viktor Malkov

• Dat ak kote li fèt: 1959 (Smolensk).

• Byografi: Li fè mekanik, ebenis e li konn kouvri kay. Li te marye ak Vera nan ane 1992. Lè l te jèn, li te renmen jwe foutbòl. Li te ede pran swen frè l ki pa wè byen.

  Yo te konnen l kòm moun ki vyolan, sa ki te fè l pase setan nan prizon. Maryaj li te sou wout kraze. Men, lè l te etidye Labib ak Temwen Jewova yo, li te vin yon moun ki trankil, yon sitwayen ki respekte lalwa e yon bon mari. Li te batize nan ane 2008. Li mouri nan dat 25 avril 2020.

Valeriy Shalev

• Dat ak kote li fèt: 1977 (Yartsevo).

• Byografi: Lè l te jèn gason, li te aprann anglè. Li te gradye nan lekòl militè. Li te deplase al viv nan lès peyi Larisi pou l travay kòm kontab nan lame a. Lè l te fin kite lame, li te travay kòm konsiltan finansye. An 1999, li te marye ak Svetlana. Li te rankontre l nan inivèsite e li te adopte tigason li an ki te gen katran. Li renmen jwe foutbòl e li renmen al kouri.

  Manman l te kòmanse etidye Labib ak Temwen Jewova yo, e li te pataje sa l aprann yo avè l. Li te eseye pwouve sa manman l t ap aprann yo se manti, men li te vin rann li kont se laverite. Li te batize nan ane 2002.

Yo te pèsekite frè yo nan vil Smolensk depi anvan desizyon Lakou siprèm peyi Larisi a te pran nan ane 2017, kote l te entèdi aktivite Temwen Jewova yo nan peyi Larisi. Nan dat ki te 18 desanm 2016 la, 15 polisye, ak zam nan men yo, te rantre nan yon Sal Wayòm nan vil Smolensk pandan reyinyon ap fèt, sa ki te fè reyinyon an oblije kanpe. Te gen 60 frè ak sè ki t ap asiste reyinyon an. Pandan polisye yo te rantre a, yo te vini ak yon seri piblikasyon gouvènman peyi Larisi di se piblikasyon ekstremis, men yo pa t kite moun wè, epi yo pran pòz se anndan Sal la yo jwenn yo.

Annapre nan ane 2018 ak ane 2019, otorite yo te kontinye rantre lakay kèk frè ak sè, yo te arete kèk nan yo e genyen yo te mete nan prizon. Nan dat ki te 25 avril 2019 la, polisye yo te rantre nan plizyè kay e yo te arete frè Ruslan Korolyov, frè Valeriy Shalev ak frè Viktor Malkov. Viktor te di otorite yo: “Yo te mete m nan prizon pou setan poutèt m t ap goumen. Men annapre m vin Temwen Jewova. Kounye a, nou vle mete m nan prizon paske […] m ap preche bon nouvèl la?”

Yo te arete frè Yevgeniy Deshko plizyè jou apre lòt frè yo, e yo te kenbe l nan prizon. Yevgeniy di: “Kòm mwen te atann sa ka rive m, mwen te pare lespri m pou sa.” Pawòl Jewova te di Jozye yo te ankouraje l: “Mete kouraj sou ou e […] mete kran sou ou. Pinga w pè e pinga w kraponnen, paske mwen menm, Jewova, Bondye w la, mwen avè w kèlkeswa kote w ale.” (Jozye 1:9). Men sa Yevgeniy esplike: “Nan vèsè sa a, Jewova mande nou pou n met kouraj sou nou, e li pwomèt l ap ede nou.”

Pandan Ruslan te nan prizon, li te medite sou pawòl Jezi te di nan Matye 6:34. Ruslan pa t enkyete l sou sa k ka rive, li di: “M te bay tèt mwen okipasyon nan ekri lèt, li Bib la epi pale ak lòt prizonye yo sou laverite. Mwen pa t vrèman gen tan pou m kite enkyetid pote m ale.”

Nan mwa mas 2020, G. P. Bezrukov, moun k ap mennen ankèt pou Sèvis sekirite federal la (FSB), te retire kèk nan restriksyon kat frè yo te genyen e yo te vin pa nan prizon ankò. Yo te pase prèske ennan fèmen nan prizon epi pa ka soti kite lakay yo. Frè nou yo ki fidèl te vin jwenn plis libète paske yo te toujou obeyi otorite yo epi yo te rete kalm pandan yo te nan prizon an. Moun ki t ap mennen ankèt la te gen konviksyon si yo gen plis libète, yo pap fè anyen k ap anpeche l fè travay li e yo pap mal reyaji lè l gen pou l poze yo kesyon.

Malerezman, yon ti tan apre sa, Viktor mouri. Anpil moun panse Viktor te vin malad anpil epi finalman li mouri akoz move kondisyon li te ye nan prizon an ak strès li te jwenn pandan otorite yo t ap poze l kesyon.

Ruslan, Valeriy ak Yevgeniy detèmine pou yo suiv egzanp Viktor ak anpil lòt moun ki rete fidèl jiskaske yo mouri. Etandone yo pwòch ak Jewova, yo pa sèlman andire pèsekisyon, men yo fè sa avèk jwa.

Valeriy di: “Lefètke m t al nan prizon, mwen vin pi pwòch Jewova. M pa t janm pwòch li konsa. Mwen li Bib la regilyèman. Prizon se pa yon bon kote pou moun ye. Se vre gen moun ki rive viv ladan l menmsi Jewova pa ede yo, men, lè Jewova ap ede w, franchman ou ka rive andire.”

Yevgeniy di kounye a li wè toutbon Jewova ede nou. Li di: “Mwen gen konviksyon Papa nou an ede nou, sitou lè n ap andire sitiyasyon ki difisil. Donk, kounye a, m pa vrèman ap enkyete sou sa m ap gen pou m andire alavni.”

Kèlkeswa sa tribinal la ta deside, Yevgeniy di: “Mwen detèmine pou m kontinye fè tout sa m kapab pou m ka andire tout difikilte yo e pou m rete fidèl.”

Avèk èd Jewova, nou konnen frè sa yo ak fanmi yo ap kontinye andire ak kè kontan nan moman difisil sa a. — 2 Tesalonisyen 3:5.