14 OKTÒB 2021
LARISI

Ki jan lavi plis pase 80 Temwen Jewova ye apre yo fin kondane yo pou y al nan prizon si yo arete yo pou menm bagay yo ankò?

FÈ L JWE

Depi avril 2017, lè peyi Larisi te entèdi aktivite Temwen Jewova yo, gen plis pase 500 frè ak sè yo arete e yo lage akizasyon sou yo kòmkwa yo se ekstremis. Gen anviwon 40 Temwen yo kondane pou al nan prizon, e gen 15 lòt yo kondane pou peye amann. Gen plis pase 80 Temwen yo kondane pou al nan prizon si yo arete yo pou menm bagay yo ankò. Se vre yo pa mande pou y al nan prizon pou kounye a, men santans yo ba yo a pa jis e sa lakòz gwo konsekans.

Selon Kòd kriminèl peyi Larisi, yon jij gen pouvwa pou l kondane yon moun pou l al nan prizon si yo arete l pou menm bagay yo ankò, konsa moun nan pa bezwen al nan prizon menm kote a. Lè sa a, jij la ap tou fè konnen pandan konbyen tan y ap suiv moun nan pou wè si l pa vyole yon seri kondisyon oswa restriksyon jij la te bay, sa ki ka fè yo mete moun nan nan prizon. Donk, si tribinal la wè moun nan vyole restriksyon yo oswa kondisyon yo, li ka kondane l pou l al nan prizon pou l pase kantite tan yo te bay nan premye santans lan.

Lè yo kondane yon moun pou l al nan prizon si yo arete l pou menm bagay yo ankò, ki jan lavi a ye pou li? E ki jan Jewova ede frè ak sè nou yo ki nan sitiyasyon sa a? Nou te fè entèvyou ak kèk nan yo yo te kondane pou fè ant dezan a sizan prizon si yo arete yo pou menm bagay yo ankò. Yo esplike difikilte yo jwenn ak fason Jewova ede yo andire.

Igor Ivashin

Dat li batize: 1999

Kantite tan yo kondane l: Sizan si yo arete l pou menm bagay yo ankò.

Kòmantè li fè

Ki efè santans yo ba ou a genyen sou aktivite w ap mennen?

Yonfwa pa mwa, mwen pale ak enspektè k ap veye pou tout sa tribinal la te di yo respekte. Mwen pa ka vwayaje kite vil la san pèmisyon enspektè m nan, menmsi se pou pran swen sante m.

Epitou, ka kriminèl yo ouvri kont mwen an gen efè sou relasyon mwen gen ak moun nan fanmi m ki pa Temwen Jewova, paske yo pa ka konprann rezon ki fè yon moun aksepte jwenn tout pwoblèm sa yo poutèt yon relijyon.

Ki efè sa gen sou fanmi w, e ki sa k ede yo kenbe?

Tout moun nan fanmi nou soufri akoz desizyon tribinal la. Eta sante nou vin pi mal. Nou pa ka evite strès sa a nèt paske nou konnen yo ka chanje santans mwen an nenpòt lè pou yo voye m nan prizon.

Men, an jeneral, nou gen yon atitid pozitif, e sa k rive yo pouse nou ede frè ak sè ki nan menm sitiyasyon yo. Pandan adorasyon an fanmi, nou regade sijè ki fè nou sonje rezon ki fè sa rive nou ak sa ki rive akoz sitiyasyon sa a: Yon bèl temwayaj ki bay devan tribinal la, nan vil la ak nan travay la.

Èske w jwenn benediksyon ou pa t atann akoz nouvo sitiyasyon w ye a?

Relasyon m ak Jewova vin pi solid. Lè m wè fason Jewova dirije evènman yo kote mwen enplike dirèkteman, pa gen bouch pou pale. Sa fè m santi Jewova renmen m.

Vladimir Kulyasov

Dat li batize: 2010

Kantite tan yo kondane l: Dezan si yo arete l pou menm bagay yo ankò.

Kòmantè li fè

Ki difikilte w jwenn lefètke yo jije w kòm ekstremis?

Pandan uit mwa, yo te mete yon braslè nan pye m pou kontwole sa m ap fè. Yo te mande m pou m ret lakay mwen soti 10 è nan aswè rive 6 è nan maten. e m pa t ka kite vil la. Akizasyon ekstremis ki sou do m nan te fè l difisil pou m jwenn travay. Mwen te kòmanse chèche travay apre yo te fin kondane m, mwen te fè senk mwa ap chèche travay. Mwen te mande travay plizyè kote, men yo tout te refize. Anpil te montre yo konprann sitiyasyon m, men yo esplike yo pa t ka fè anyen pou mwen paske moun ki sou tèt yo a pa t vle yo pran m.

Ki jan w ankouraje kwayan parèy ou sitiyasyon w lan afekte?

Lè n ap pale sou difikilte nou, nou pale tou sou benediksyon Jewova ban nou. Nou pale sou privilèj Jewova ban nou pou nou bay non l glwa, e nou pale sou fason relasyon nou ak Jewova vin pi sere ak jan sitiyasyon sa a fè nou vin devlope yon seri kalite. Nou ba yo asirans malgre tout difikilte yo, nou pap boukante benediksyon nou jwenn akoz sitiyasyon sa a pou anyen.

Èske w jwenn kèk benediksyon w pa t atann akoz nouvo sitiyasyon w ye a?

Gen yon sè ki te travay kòm asistan pèsonèl e ki te di patwon l bezwen yon moun pou pran swen lakou a. Nou te priye Jewova anpil. Patwon an te dakò pran m pou travay la san l pa t mande m okenn dokiman tou senpleman paske sè a te pale de mwen. Se te yon gwo benediksyon! Se te repons priyè nou. Grasa èd Papa nou ki nan syèl la, mwen te aprann yon nouvo metye: pran swen plant. Se toutbon Jewova ka ede sèvitè l yo vin kèlkeswa sa li vle a!

Denis Timoshin

Dat li batize: 1998

Kantite tan yo kondane l: Dezan prizon si yo arete l pou menm bagay yo ankò.

Kòmantè li fè

Ki efè santans yo ba ou a genyen sou ou e sou aktivite w ap mennen?

Yo te met yon braslè nan pye m pou kontwole m. Li manje pye m, e sa […] imilyan paske braslè sa a fè m sonje kolye yo konn met nan kou chen yo. Se kòmsi kò m pa pou mwen.

Gen zòn yo te entèdi m kite. Pa egzanp, nan ri yon vil, mwen gendwa pa gen pwoblèm pou m sou yon bò ri a, men mwen pa gendwa travèse al lòt bò a. Travay mwen se repare materyèl moun itilize nan kay, donk, lè pou m aksepte al fè yon travay, mwen dwe ret sou pinga pou m pa ale nan zòn mwen pa dwe ale yo, menmsi se pa aksidan. Se yon sitiyasyon ki stresan, e mete sou sa, li difisil tou pou m esplike kliyan m yo rezon ki fè mwen pa ka aksepte travay nan kèk adrès.

Ki sa w fè pou w rive jere strès sa bay lè yo kondane w pou w al nan prizon si yo arete w pou menm bagay yo ankò?

Mwen eseye wè sitiyasyon sa a kòm yon okazyon pou m montre Bondye mwen fidèl avèk li. Mwen konnen fason Jewova wè m pa depann sou jan Leta wè m nan.

Mwen menm ak madanm mwen medite anpil sou kokenn privilèj nou genyen pou nou patisipe nan fè non Jewova vin sen. Nou te wè ak je nou jan Jewova pran swen nou, jan li konsole nou e jan li ede nou pou n kontinye gen yon lafwa solid pandan tout ane sa yo. Nou pa t janm manke anyen, menm lè mwen te pase ennan edmi lakay mwen san m pa t ka al kote m vle [anvan yo te kondane m pou m al nan prizon si yo arete m pou menm bagay yo ankò], e madanm mwen pa t ka travay akoz pwoblèm sante.

Ti apèsi sa a nou genyen sou jan lavi a ye pou moun yo kondane pou al nan prizon si yo arete yo pou menm bagay yo ankò pouse nou priye plis toujou, e espesyalman pou yo menm ak fanmi yo. Eksperyans yo fè bay plis prèv toujou ki montre Jewova reponn priyè konsa nou fè e li ede sèvitè fidèl li yo nan tout kalite eprèv yo ye. — 2 Korentyen 1:3, 4.

Lòt sijè ki enteresan

NOUVÈL

Yo nan prizon pou lafwa yo — Larisi

Gen Temwen Jewova nan peyi Larisi yo mete nan prizon pou lafwa yo. Aprann nan istwa yo, e w ap ka enprime yon lis ki gen Temwen nan peyi Larisi ki nan prizon.

NOUVÈL