Nan yon lèt Sekretè jeneral Konsèy ewopeyen an (COE) te voye bay Minis zafè etranje Larisi a nan dat 9 desanm 2022, li te mande pou Larisi obeyi desizyon Tribinal ewopeyen dwa moun nan (ECHR) te pran sa pa gen lontan. Nan jijman sa a, gen desizyon enpòtan yo te pran nan mwa jen 2022 a ki fè konnen desizyon Larisi pran pou l entèdi aktivite Temwen Jewova yo pa respekte lalwa. a

Nan lèt sa a, yo te fè Larisi sonje aktout li pa yon manm nan COE a ankò depi mas 2022, gouvènman an toujou oblije respekte desizyon ECHR te pran nan dat 16 septanm 2022 a. Anplis de sa, gwoup minis COE a ap kontinye sipèvize travay ki fèt pou aplike desizyon tribinal la te pran an.

Depi jijman jen 2022 a, yon fason ki fèm, gwoup la pa sispann mande Larisi pou l retounen sou desizyon Lakou siprèm nan te pran an 2017 la kote l te entèdi aktivite relijye Temwen Jewova yo. Gwoup la mande Larisi tou pou l “regade lwa ki te pase ki fè konnen òganizasyon Temwen Jewova yo se yon òganizasyon ki ekstremis [...]; pou l sispann tout ankèt kriminèl y ap fè kont Temwen Jewova yo e pou l libere Temwen ki nan prizon yo, pou l efase dosye kriminèl yo, epi pou l rebay Temwen yo tout byen ki te pou yo.” b

Jiska jodi a, entèdiksyon an lakòz gen plis pase 660 frè ak sè ki peye amann oswa ki jwenn kondanasyon jis paske y ap sèvi Jewova. Gen plis pase 360 nan yo ki te pase yon tan nan prizon, e gen 114 ladan yo ki nan prizon kounye a.

Gen plis pase 450 frè ak sè Larisi ajoute sou lis moun ki ekstremis e ki teworis, sa ki gen gwo konsekans pou yo ansanm ak fanmi yo. Lè yon moun sou lis sa a, yon lis tout moun ka wè, sa fè li vin gen yon move repitasyon e sa anpeche l jwenn travay. Anplis de sa, kòm konsekans, kont an bank yo bloke, yo pa ka jwenn oswa renouvle asirans yo, yo pa ka vann sa yo posede, yo pa ka fè envestisman, yo pa ka resevwa eritaj, yo pa ka menm achte SIM kat pou telefòn yo.

Nou kontan konnen COE a kontinye ap chèche reparasyon pou frè ak sè nou yo ki nan peyi Larisi. Anmenmtan tou, frè ak sè nou yo sou tout tè a kontinye jwenn ankourajman nan rapò ki toujou parèt sou jw.org konsènan fason frè ak sè larisi yo montre yo gen lafwa, kouraj ak kè kontan grasa èd Jewova. — Filipyen 1:12-14.