ribinal vil Abakan, nan Repiblik Kakasya, ka fè konnen desizyon li pran nan ka frè Roman Baranovskiy ak manman l, sè Valentina Baranovskaya, 1^ye fevriye 2021 a. Komisè gouvènman an poko di ki santans li ta vle yo ba yo.

Roman Baranovskiy

• Dat ak kote li fèt: 1974 (Balakovo, nan rejyon Saratòv).

• Byografi: Pou l pran swen tèt li ak manman l, li renove kay. Li renmen jwe gita, echèk ak foutbòl.

  Lè l te adolesan, li te konn mande tèt li ki sans lavi a. Li di: “Pafwa m te konn mande Bondye pou l montre m bon chemen an.” An 1993, li te kòmanse etidye Labib ak Temwen Jewova yo. Li te batize an 1997.

Valentina Baranovskaya

• Dat ak kote li fèt: 1951 (Vannovka, Kazakhstan)

• Byografi: Li te konn travay kòm kontab e kòm konseye nan domèn finans. Li te pran retrèt li an 2006. Li renmen fè manje, ekri chante ak powèm.

  An 1995, ni li ni pitit gason l lan te kòmanse etidye Labib ak Temwen Jewova yo. Sa ki te plis enpresyone l se lè l te aprann Bondye pa ka bay manti. Li te batize an 1996.

Nan lannuit 10 avril 2019 la, yon seri polisye, zam alamen, te fouye kat kay Temwen nan Abakan, e youn nan kay sa yo se te kay frè Roman Baranovskiy ak manman l, Valentina. Polisye yo te sezi Bib yo, aparèy elektwonik yo ak dokiman pèsonèl yo. Yo te ouvri yon dosye kriminèl kont Roman ak Valentina.

Frè Roman di: “Lè yo te kòmanse fouye kay yo, nou t ap asiste reyinyon lasemèn nan e nou fèk fin pale sou 1 Korentyen 10:13. Gen yon pwen ki te trèzenpòtan: Jewova pa deside ki eprèv n ap gen pou n andire. [...] Li pa di tèt li: ‘Ou menm ou djanm, w ap ka fè fas ak eprèv sa a. Men ou menm, ou pa twò djanm, men yon eprèv ki pi fasil.’ Si se te konsa, tout bagay t ap depann de pwòp fòs nou. Men, reyalite a sèke diferan kalite eprèv ka tonbe sou nenpòt nan nou. Si n konte sou fòs Jewova, nou tout ap kapab andire.”

Nan mwa jiyè 2020, Valentina te fè yon stwok. Li di: “Lè sante m te vin deteryore, m te ka wè pi klè toujou Jewova t ap ede m. Paske m pa t janm sispann priye, e se tankou li te pran m nan bra l. M te santi m anpè e m te santi m kalm, yon bagay m pa ka jwenn mo pou m fin esplike l.”

Tout bagay sa yo te fè Valentina pran detèminasyon pou l ret fidèl ak Jewova. Li di: “Detèminasyon m se pou m sèvi Papa m ki nan syèl la pou toutan e pou m ret fidèl ak li kèlkeswa sa k rive nan lavi m.”

Roman di lefètke l medite sou bèl egzanp andirans ki parèt nan Bib la e ki genyen nan epòk pa nou an sa ede l fòtifye lafwa l. Lè l ap reflechi sou egzanp moun sa yo, souvan li mande tèt li: ‘Ki eprèv yo te gen pou yo andire e poukisa? Ki sa ki te ede yo rete fidèl? Ki jan Jewova te soutni yo pa mwayen lespri sen l?’ Repons kesyon sa yo te fè Roman gen plis asirans toujou kèlkeswa eprèv la “Jewova ap ban nou pisans ki depase sa ki nòmal la si sa nesesè”.

N ap priye Jewova pou Roman, Valentina, ak tout frè ak sè nou yo nan peyi Larisi ka kontinye konte sou li antanke refij yo ak fòs yo. — Sòm 46:1.